«វប្បធម៌»ផ្តេកផ្តួលតែលើជំនួយគឺជាគ្រោះថ្នាក់សម្រាប់សង្គមកម្ពុជា ~ khmer news

កិច្ចប្រជុំសម្របសម្រួលរវាងដៃគូអភិវឌ្ឍន៍ (ម្ចាស់ជំនួយ) ជាមួយរដ្ឋាភិបាល

RFI/Bona Pen

Radio France Internationale

ក្នុងសង្គមកម្ពុជាបច្ចុប្បន្ន ស្ទើរតែគ្រប់វិស័យទាំងអស់ត្រូវការជំនួយបរទេសដើម្បីដំណើរការគម្រោងអ្វីមួយ។ ជំនួយបរទេសជារឿងមិនអាចចៀសវាងបានសម្រាប់សង្គមមួយដែលងើបពីភាពខ្ទេចខ្ទាំដូចកម្ពុជា ប៉ុន្តែ ជាទូទៅ ការរង់ចាំតែជំនួយខ្លាំងពេកធ្វើឲ្យខ្មែរបាត់បង់ការពឹងពាក់លើខ្លួនឯង។ ម្យ៉ាងទៀត ក្រោយពីម្ចាស់ជំនួយដកខ្លួន គម្រោងអភិវឌ្ឍន៍នានាច្រើនតែគាំងលែងអាចដំណើរការបានទៀត។ នេះមានន័យថា ភាគីកម្ពុជាដែលទទួលខុសត្រូវក្នុងវិស័យនីមួយៗ ហាក់មិនបានទាញយកសក្តានុពលនៃជំនួយបរទេសដើម្បីពង្រឹងសមត្ថភាពខ្លួនឯងនៅឡើយទេ។ នេះជាទម្លាប់ដ៏គ្រោះថ្នាក់ដែលគួរកែប្រែ។

រយៈពេលពីរទសវត្សរ៍ចុងក្រោយនេះ ប្រទេសកម្ពុជាបានទទួលជំនួយបរទេសយ៉ាងច្រើនសន្ធឹកសន្ធាប់ ទាំងជំនួយជាថវិកា ទាំងជំនួយបច្ចេកទេស។ ជំនួយបរទេសបានចូលរួមចំណែកយ៉ាងសំខាន់ក្នុងការស្តារសង្គមកម្ពុជាឡើងវិញចេញពីភាពខ្ទេចខ្ទាំដែលបន្សល់ទុកពីរបបខ្មែរក្រហម។ ការពឹងពាក់លើជំនួយបរទេសក៏ត្រូវគេមើលឃើញថា នឹងមានរយៈពេលយូរតទៅទៀត។

ប៉ុន្តែ ជំនួយបរទេស ក៏បានបង្កើត«វប្បធម៌»ផ្តេកផ្តួលទៅលើតែជំនួយកាន់តែច្រើនឡើងដែរនៅក្នុងសង្គមកម្ពុជា។ ជាទូទៅ ប្រធានស្ថាប័ននីមួយៗតែងស្វែងរកជំនួយយកមកអនុវត្តគម្រោងអ្វីមួយដើម្បីអភិវឌ្ឍន៍ស្ថាប័នរបស់ខ្លួន។ ការខិតខំស្វះស្វែងទាក់ទាញម្ចាស់ជំនួយឲ្យគាំទ្រគម្រោងអភិវឌ្ឍន៍នានាគឺជារឿងល្អមួយ ប៉ុន្តែ អ្វីដែលអាក្រក់នោះគឺ មន្ត្រីខ្មែរមួយចំនួនច្រើនតែមិនសប្បាយចិត្តនឹងជំនួយបច្ចេកទេសប៉ុន្មានឡើយ ប្រសិនបើគ្មានថវិកាភ្ជាប់ជាមួយ។ ជាទូទៅ ពួកគេត្រូវការប្រយោជន៍បុគ្គលថែមទៀតពីគម្រោងអភិវឌ្ឍន៍ទាំងនោះ។

ម្យ៉ាងទៀត ទោះជាបានទទួលជំនួយជាច្រើនឆ្នាំ ប៉ុន្តែ នៅពេលម្ចាស់ជំនួយដកខ្លួន គម្រោងទាំងនោះភាគច្រើនក៏ឈប់ដំណើរការ ហើយអ្វីៗក៏បានវិលមករកសភាពដើមវិញតែដដែល។ នេះសបញ្ជាក់ឲ្យឃើញពី«វប្បធម៌»ពឹងពាក់តែលើជំនួយបរទេសទាំងស្រុងដោយមិនបានរៀនសូត្រអ្វីសោះពីម្ចាស់ជំនួយ។ ទម្លាប់ដែលគួរឲ្យកត់សម្គាល់មួយទៀតនោះគឺ ក្រសួង ឬស្ថាប័នជាច្រើន មិនបានព្យាយាមប្រើប្រាស់គ្រប់លទ្ធភាពរបស់ខ្លួនសិនមុននឹងពឹងលើជំនួយនោះឡើយ តែពួកគេហាក់ដូចជាទន្ទឹងរង់ចាំទាល់តែមានជំនួយទើបអាចធ្វើអ្វីបាន។ ជាក់ស្តែង គ្រាន់តែស្ប៉តអប់រំខ្លីមួយក៏ចាំបាច់ត្រូវមានការឧបត្ថម្ភពីសំណាក់ម្ចាស់ជំនួយជាច្រើនដែរ ប្រសិនបើមិនដូច្នោះទេ គេប្រាកដជាមិនអាចផលិតបានឡើយ។

ជាការពិតណាស់ ជំនួយថវិកាក្តី ឬជំនួយបច្ចេកទេសក្តី ពិតជាមានតម្លៃណាស់សម្រាប់សង្គមក្រីក្រដូចជាកម្ពុជា។ ដូច្នេះ ដើម្បីឲ្យជំនួយទាំងនោះមានប្រយោជន៍,

ទី១ គេត្រូវប្រើប្រាស់វាឲ្យអស់លទ្ធភាពនិងឲ្យចំទិសដៅ និង

ទី២ គេត្រូវទាញយកប្រយោជន៍ពីការអនុវត្តគម្រោងទាំងនោះឲ្យបានក្នុងកម្រិតអតិបរមាសម្រាប់កសាងសមត្ថភាពធនធានមនុស្សរបស់ខ្លួនដើម្បីអាចធានានិរន្តរភាពនៃគម្រោងនៅក្រោយពេលម្ចាស់ជំនួយដកខ្លួន ពោលគឺនេះជាដំណាក់កាលដែលខ្មែរត្រូវរៀនចាប់ត្រីដោយខ្លួនឯងដោយមិនត្រូវរង់ចាំគេផ្តល់ត្រីឲ្យតែរហូតនោះឡើយ។
នៅក្នុងបណ្តាប្រទេសជិតខាងយើង គេត្រេកអរនឹងទទួលជំនួយបច្ចេកទេសពីអង្គការអន្តរជាតិ ឬពីរដ្ឋាភិបាលបរទេសណាមួយទោះបីមិនមែនជាជំនួយជាថវិកាក៏ដោយ។ ប៉ុន្តែ នៅកម្ពុជា ជំនួយបច្ចេកទេសហាក់ដូចជាមានតម្លៃតិចជាងជំនួយថវិកា។ រីឯការកេងចំណេញពីជំនួយបរទេសទៀតសោត ហាក់ដូចជាមានគោលដៅបុគ្គលច្រើនជាងប្រយោជន៍សាធារណៈទៅវិញ។ ប្រសិនបើគ្មានប្រយោជន៍ផ្ទាល់ខ្លួនទេ អ្នកទទួលជំនួយនឹងមិនសូវចាប់អារម្មណ៍ឡើយ។ នេះជាឥរិយាបថខុសឆ្គងដ៏ធំមួយដែលបាន និងកំពុងបង្អាក់ដំណើរការអភិវឌ្ឍន៍ប្រទេសកម្ពុជា និងកំពុងធ្វើឲ្យម្ចាស់ជំនួយអស់ទឹកចិត្ត។

ដូច្នេះ ដើម្បីពន្លឿនការអភិវឌ្ឍ ពលរដ្ឋខ្មែរខ្លួនឯងជាពិសេសមន្ត្រីមានសមត្ថកិច្ច ត្រូវផ្លាស់ប្តូរឥរិយាបថមួយចំនួនជាចាំបាច់៖

ទី១ ត្រូវលុបបំបាត់«វប្បធម៌»ផ្តេកផ្តួលពឹងតែលើជំនួយ ហើយបែរមកប្រកាន់ទស្សនៈ«ខ្លួនទីពឹងខ្លួន»ឲ្យបានច្រើនតាមដែលអាចធ្វើបាន។

ទី២ នៅពេលមានជំនួយពីខាងក្រៅ គេត្រូវប្រើប្រាស់វាឲ្យមានប្រយោជន៍ពីរទន្ទឹមគ្នា គឺ ប្រយោជន៍ហេដ្ឋារចនាសម្ពន្ធ័រូបវន្ត័ផង និងការអភិវឌ្ឍន៍សមត្ថភាពធនធានមនុស្សផង។ ជំនួយថវិកាជារឿងសំខាន់មួយហើយ ប៉ុន្តែ ជំនួយខាងការអភិវឌ្ឍន៍សមត្ថភាពធនធានមនុស្សរឹតតែចាំបាច់ថែមទៀតដើម្បីឲ្យខ្មែរអាចពង្រឹងខ្លួនឯងបាន និងឈានទៅរកឯករាជភាពពីជំនួយបរទេសឲ្យបានឆាប់តាមដែលអាចធ្វើទៅបាន។
ផ្ទុយទៅវិញ ការបន្តពឹងផ្អែកផ្តេកផ្តួលលើជំនួយខ្លាំងពេក ឬការរង់ចាំតែកេងចំណេញពីជំនួយបរទេសដើម្បីប្រយោជន៍ផ្ទាល់ខ្លួន គឺជាគ្រោះថ្នាក់ធំធេងសម្រាប់សង្គមកម្ពុជាទាំងបច្ចុប្បន្ន និង ទៅ អនាគត៕

Posted in: khmer news

khmer news

Freedom of news in the world ,wanted to show the problem in the societies

ខ្មែរស្រឡាញ់ខ្មែរចេះជួយខ្មែរនោះប្រទេសរបស់យើងអាចរីកចំរើនបាន

Cambodia's Tourism Attraction

My Friend Blog List

Here ! Computer Technique for you

Wednesday, November 28, 2012