“នៅទីបំផុត​ប្ដី​ខ្ញុំ​ជ្រើស​ម្ដាយ ចោល​ប្រពន្ធ”។នេះ​​ជា​សំដី​របស់​អ្នក​ស្រី​ឡានី។ អ្នក​ស្រី​ឡានី ធ្លាប់​បាន​លាត​ត្រដាង​ពី​ចំណង​ស្នេហា​គ្រួសារ​ម្ដង​រួច​ហើយ ដែល​សប្បាយ​បាន​ចុះ​ផ្សាយ​នៅ​អត្ថបទ​មុន​មាន​ចំណង​ជើង​ថា “បើ​បង​នៅតែ​​អោប​ម្ដាយ​​បង​ទៅ​ចុះ​”?។​
ឥឡូវ​នេះ​ លទ្ធផល​បាន​ស​បញ្ជាក់​ឲ្យ​ឃើញ​ថា ប្ដី​បាន​ជ្រើស​រើស​ម្ដាយ​ ចោល ​ប្រពន្ធ ដោយ​សុផល​ដែល​ជា​ប្ដី​ បាន​ដាក់​ពាក្យ​លែង​ប្រពន្ធ​​ នៅ​សាលា​សង្កាត់​ហើយ​។ រឿង​រ៉ាវ​ដែល​ឈាន​ដល់​ផ្លូវ​បំបែក​រវាង​អ្នកស្រី​ឡានី និង​លោក​សុផល ព្រោះ​តែ​​​សុផល​ជ្រើស​យក​ម្ដាយ​ ដោយ​សារ​ខឹង​ប្រពន្ធ​បាន​ប្រើ​ពាក្យ​មិន​គួរ​សម​ខ្លាំង​ដាក់​ម្ដាយ​ នៅ​គ្រា​ដែល​ម្ដាយ​ក្មេក​ និង​កូន​ប្រសា​ស្រី​មិន​ត្រូវ​គ្នា​។

អ្នក ​ស្រី​ឡានី បាន​និយាយ​ថា តាម​ពិត​ខ្ញុំ​ដឹង​ខ្លួន​ខុស​ដែរ ប៉ុន្តែ​ រឿង​នោះ​ ដោយ​សារ​តែ​ខ្ញុំ​ទ្រាំ​មិន​បាន​នៅ​ទង្វើ​ម្ដាយ​ក្មេក​ ដែល​តែង​តែ​ មក​រក​លុយ​ប្ដី​អស់​ៗ​ពី​ហោប៉ៅ​រហូត​។ ដូច្នេះ​ថ្ងៃ​មួយ​ខ្ញុំ​បាន​ប្រើ​ពាក្យ​ខ្លាំង​ៗ​នៅ​ចំពោះ​មុខ​គាត់ ដែល​ធ្វើ​ឲ្យ​គាត់​មិន​សប្បាយ​ចិត្ត​ ហើយ​បាន​ហៅ​កូន​ប្រុស​ឲ្យ​ទៅ​ផ្ទះ​វិញ។
“នៅ​ពេល​ប្ដី​ខ្ញុំ​ចុះ​ពី​ ផ្ទះ​បាន​បី​ថ្ងៃ ស្រាប់​តែ​ប្ដី​ខ្ញុំ​បាន​សម្រេច​ចិត្ត​ដាក់​ពាក្យ​សុំ​លែងលះ​ ជាមួយ​ខ្ញុំ​នៅ​សាលា​សង្កាត់​ ហើយ​គេ​បាន​កោះ​ហៅ​ ឲ្យ​ខ្ញុំ​ទៅ​ដោះស្រាយ​រឿង​នេះ​”។ ខ្ញុំ​សូម​បញ្ជាក់​ថា ខ្ញុំ​ក៏​ព្រម​ទទួល​ការ​លែងលះ​នេះ ប៉ុន្តែ​ភាព​ប្រទាក់ប្រទើស​នោះ គឺ​ប្ដី​ខ្ញុំ​នៅតែ​ទាមទារ​ ចង់​បាន​កូន​ តែ​ខ្ញុំ​មិន​ព្រម​”​។
ទោះ​យ៉ាង​ណា​ក៏ដោយ​ មន្ត្រី​នៅ​សាលា​សង្កាត់​បាន​ព្យាយាម​សម្រុះ​ សម្រួល​រឿង​ទំនាស់​នេះ ប៉ុន្តែ​ខ្ញុំ​គិត​ថា អ្វី​ៗ​ទំនង​ជា​មិន​អាច​ចុះ​សម្រុង​គ្នា​បាន​នោះ​ទេ ទោះ​ដល់​ណា​ក៏​ដោយ​ ខ្ញុំ​នៅ​តែ​បន្ត​ប្ដេជ្ញា​លែងលះ​ប្ដី​របស់​ខ្ញុំ ហើយ​និង​ទាមទារ​កូន​។ នេះ​ជា​ការ​បញ្ជាក់​របស់​អ្នក​ស្រី​ឡានី។
“ខ្ញុំ​ដឹង​ថា សាលាឃុំ សង្កាត់​មិន​មែន​ជា​កន្លែង​លែងលះ​នោះទេ ព្រោះ​ចំណង​អាពាហ៍ពិពាហ៍​របស់​ខ្ញុំ​មាន​សំបុត្រ​អាពាហ៍ពិពាហ៍​ ដូច្នេះ​សាលា​ឃុំ សង្កាត់ គ្រាន់​តែ​ជា​កន្លែង​ផ្សះផ្សារ​ប៉ុណ្ណោះ គឺ​មាន​តែ​តុលាការ​ទេ ដែល​មាន​សិទ្ធិ​សម្រេច​លើ​ការ​លែងលះ​នេះ​”។ នេះ​ជា​ការ​បញ្ជាក់​របស់​អ្នក​ស្រី​ឡានី។​
“មិនយូរ​មិន​ឆាប់​នោះទេ ខ្ញុំ​គិត​ថា វា​នឹង​ឈាន​ដល់​តុលាការ​ ប្រសិន​បើ​មន្រ្តី​សាលា​ឃុំ​សង្កាត់ គាត់​សម្រុះសម្រួល​ពួក​ខ្ញុំ​មិន​ត្រូវ​នោះ​”។ អ្នកស្រី​ឡានី​បាន​បញ្ជាក់​ថា ទោះ​ទៅ​ដល់​តុលាការ​ ក៏​ខ្ញុំ​នៅតែ​ទាមទារ​កូន និង​លែង​ប្ដី​ខ្ញុំ​ដែរ​ ព្រោះ​ចំណង​អាពាហ៍ពិពាហ៍​ពីរ​ឆ្នាំ​មក​នេះ គាត់​មិន​ដែល​ខ្វល់​ខ្វាយ​ពីខ្ញុំ​នោះ​ទេ​ ផ្ទុយ​ទៅ​វិញ​គាត់​ត្រចៀក​ស្រាល និង​ស្ដាប់​ម្ដាយ​ច្រើនជាង​”៕​
អត្ថបទ៖វិបុត្រ
ប្រសិនបើ ​ប្រិយមិត្ត​ មាន​បញ្ហា​វិបត្តិ​ស្នេហា​​ស្រដៀង​នេះ​ ឬ​ស្នេហា​ជោគជ័យ ដែល​​​ចង់​ចែក​រំលែក​ដល់​មិត្ត​អ្នក​អាន​បាន​ជា​បទ​ពិសោធន៍ ឬ​ជួយ​​ជា​យោបល់​ក្នុង​ការ​ដោះ​ស្រាយ​បញ្ហា​ក្នុង​​ជីវិត សូម​ផ្ញើ​អត្ថបទ​រឿង​របស់​​​​​​​​​​​​​​​​​អ្នក​មក​កាន់​ Sabay តាម​រយៈ​ may.soklim@cidc.com.kh ។ ឬ​អ្នក​​អាច​ទូរស័ព្ទ​មក​យើង ០១៦ ៧៩២ ១៥១ ប្រសិន​បើ​អ្នក​ពិបាក​ក្នុង​ការ​សរសេរ​រៀប​រាប់​​រឿង​របស់​​ខ្លួន។ Sabay នឹង​សរសេរ​​​ចុះ​​ផ្សាយ​​ជូន។