ក្លិន​ក្រ​អូប​នឹង​អាច​​ជួយ​កាត់​បន្ថយ​ភាព​តាន​តឹង​ ឬ​​អាច​ធ្វើ​ឲ្យ​អារម្មណ៍ របស់​យើង​ស្រស់​ស្រាយ​មួយ​កម្រិត​។ ប៉ុន្តែ​​បើ​ក្លិន​ខ្លួន​មិន​ល្អ​វិញ ​តើ​ធ្វើ​ឲ្យ​​អ្នក​មាន​អារម្មណ៍​យ៉ាង​ម៉េច​ដែរ?​ ពិសេស​យុវជន​ បើ​​​មាន​ក្លិន​ខ្លួន​មិន​ល្អ​វិញ​ តើ​ស្រីៗ​​និយាយដើម​​​អ្នក​​​អ្វី​ខ្លះ?
កញ្ញា​ សោ​ភា​ និស្សិត​សកល​វិទ្យាល័យ​ជាតិ​គ្រប់​គ្រង​ផ្នែក​គណនេយ្យ
“ខ្ញុំ​មាន​អារម្មណ៍​ពិបាក​ទ្រំាំ​មែន​ទែន​​ ពេល​ធំ​ក្លិន​មិន​ល្អ​ ពិសេស​ក្លិន​ក្លៀក របស់ ​បុរស​​តែ​ម្តង​​។ ​​មិន​មែន​មាន​​តែ​ខ្ញុំ​ទេ​ ដែល​ពិបាក​ទ្រាំ​ក្លិន​ តែ​មិត្ត​ភ័ក្កិ​ផេ្សង​ទៀត​ក៏​​មាន​អារម្មណ៍​ពិបាក​ទ្រាំ​ដូច​ខ្ញុំ​ដែរ​។ ពេល​ខ្លះ​ខ្ញុំ​ស្តាប់​គ្រូ​ពន្យល់​មេរៀន​សឹង​បែក​អារម្មណ៍​អស់​ហើយ​ ព្រោះ​​តែ​ធំ​​ក្លិន​​សា​ក្លៀក​​​របស់​សិស្ស​ប្រុស​ៗ​​ ដោយ​សារ​​ប្រុសៗទាំង​​នោះ​​​មាន​ញើស​ច្រើន​​​​​​”។
កញ្ញា​ មុន្នី​ និស្សិត​ឆ្នាំ​ទី​៣​ សិក្សា​នៅ​សកល​វិទ្យាល័យ​ភូមិន្ទ​ភ្នំពេញ
“អ្នក​ខ្លះ​រូប​រាង​សង្ហា​ដែរ​ ប៉ុន្តែ​គ្រាន់តែ​​​ដើរ​កាត់​មុខ ធំ​ក្លិន​ឡើង​ឆួល សឹង​ទ្រាំ​មិន​បាន​​​។ ខ្ញុំ​មិន​លាក់​បាំង​ទេ ​ប្រុស​ៗ​​នៅ​ក្នុង​ថ្នាក់​រៀន​ខ្ញុំ​មាន​មិន​តិច​នាក់​ទេ​ដែល​មាន​បញ្ហា​​ ក្លិន​​ក្លៀក។ ​ពេល​ខ្លះ​បើ​បាន​លេង​បាល់​ហើយ​ ​បែក​ញើស​​​ទៀត នៅ​ក្នុង​ថ្នាក់​រឹត​តែ​ពិបាក​ទ្រាំ​តែ​ម្ដង”។​​
កញ្ញា​ សុជាតិ​​ និស្សិត​សកល​វិទ្យាល័យ​​​​បៀល​ប្រាយ
“នេះ ​ជា​ចំណុច​សំខាន់​មួយ​ ដែល​​ប្រុស​ៗ​ខ្លះ​​មើល​រំលង។​ ខ្ញុំ​គិត​ថា ​​បើ​គេ​មាន​​ក្លិន​ខ្លួន​​មិន​ល្អ​ ក៏​អាច​ជះ​ឥទ្ធិពល​ដល់​​ការ​ទំនាក់​ទំនង​ និង​ភាព​ស្និត​ស្នាល​របស់​យើង​ផង​ដែរ។ មិន​លាក់​បាំង​ទេ ​ថ្ងៃ​មួយ​ខ្ញុំ​បាន​​ពឹង​មិត្តភ័ក្ដិ​ប្រុស​ម្នាក់ ឲ្យ​ជួយ​ជូន​ទៅ​ទិញ​​សម្ភារៈ​​ផ្សេង​ៗ​ សម្រាប់​ពិធី​ជុប​លៀង​​​មួយ​ ក្រោយ​ប្រលង​ឆមាស​ចប់។ ពេល​កំពុង​ជិះ​ជា​មួយ​គាត់​ពី​ក្រោយ​​ ខ្ញុំ​ពិត​ជា​ពិបាក​ទ្រាំ​ក្លិន​ខ្លួន​របស់​គាត់​មែន​ទែន​​​​​” ។
កញ្ញា​ ធីតា​ និស្សិត​​សកល​វិទ្យាល័យ​​បញ្ញា​ជាតិ
“ខ្ញុំ ​មាន​មិត្ត​ភ័ក្កិ​ម្នាក់​ក៏​បាន​ត្អូញ​ត្អែ​រឿង​​ហ្នឹង​​ដែរ។ ​សង្សារ​គេ​​មាន​ក្លិន​ខ្លួ​ន​មិន​ល្អ​ ប៉ុន្តែ​ក្រោយ​ពី​បាន​ប្រាប់​នូវ​ចំណុច​ទាំង​អស់​នេះ សង្សារ​របស់​គេ​ក៏បាន​ធ្វើ​អនាម័យខ្លួន​​ឡើង​វិញ​។ ខ្ញុំ​គិត​ថា​ គ្មាន​អ្នក​ណា​ម្នាក់​ចង់​​ស្រូប​ក្លិន​មិន​ល្អ​ ឬ​ចង់​បាន​​ក្លិន​ខ្លួន​មិន​ល្អ​នោះ​ទេ​។ ប៉ុន្តែ​ដើម្បី​ជៀស​​បញ្ហា​ក្លិន​ខ្លួន​មិន​​ល្អ​ ចំណុច​សំខាន់​គឺ​ការ​ធ្វើ​អនាម័យ​លើ​ខ្លួន​​ប្រាណ​​ ពិសេស​​ការ​ប្រើ​ផលិត​ផល​​លាប​ក្លៀក​ ឬ​ប្រើ​ផលិត​ផល​បាញ់​ខ្លួន​ជាដើម​​​​”៕
តើ​យុវវ័យ​យល់​យ៉ាង​ណា​ចំពោះ​បញ្ហា​ខាង​លើ​នេះ?