សង្គមស៊ិវិលនៅតែ មិនសូវពេញចិត្តក្នុង ការបន្ធូរបន្ថយទោស លោកសម រង្ស៊ី នៅឡើយ

ភ្នំពេញ ៖ ក្រុមសង្គមស៊ីវិល នៅតែបន្ត ជំរុញឲ្យរដ្ឋាភិបាលកម្ពុជា ដោះស្រាយបញ្ហាជាមួយ មេដឹកនាំគណបក្សប្រឆាំង តាមផ្លូវនយោបាយ ដើម្បីឲ្យមេដឹកនាំរូបនេះ បានត្រឡប់ចូលមកប្រទេសកម្ពុជាវិញ ដើម្បីប្រគួតប្រជែង​ការបោះឆ្នោតនាពេលខាងមុខនេះ ដែលជាការល្អប្រសើរសម្រាប់ប្រទេស ដែលមានប្រជាធិបតេយ្យ។ ការលើកឡើងយ៉ាងដូច្នោះ បន្ទាប់ពីតុលាការសាលាឧទ្ធរណ៍ បានសម្រេចបន្ធូរបន្ថយទោស លោក សម រង្ស៊ី ក្នុងរឿងផែនទី​ក្លែងក្លាយ នៅថ្ងៃអង្គារ ទី២០ ខែកញ្ញា ។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានមានប្រសាសន៍ នៅថ្ងៃទី២០ ខែកញ្ញា ឆ្នាំ២០១១ នេះថា ក្នុងករណីលោក សម រង្ស៊ី ផ្លូវដែលដោះស្រាយបាន គឺមានតែការដោះស្រាយ តាមផ្លូវនយោបាយ​តែប៉ុណ្ណោះ ​ទើបអាចឲ្យលោក សម រង្ស៊ី វិលចូលប្រទេសកម្ពុជាវិញបាន ដើម្បីចូលរួមក្នុងការបោះឆ្នោត នាពេលខាងមុខ នេះផងដែរ។
លោក បន្តថា "ខ្ញុំមានការគាំទ្រចំពោះការបន្ធូរបន្ថយទោសនេះ ប៉ុន្តែថាទាល់តែមានដំណោះស្រាយមួយ ដែលធ្វើយ៉ាងណាឲ្យលោក សម រង្ស៊ី វិលត្រឡប់មក ប្រកួតប្រជែងក្នុងការបោះឆ្នោតបាន ទើបជារឿងល្អ សម្រាប់ដំណើរការប្រជាធិបតេយ្យ នៅក្នុងប្រទេសយើង" ។
ប្រធានសមាគមគ្រូបង្រៀនកម្ពុជា ឯករាជ្យ លោក រ៉ុង ឈុន បានលើកឡើងដែរថា បញ្ហាលោក សម រង្ស៊ី គឺជារឿងនយោបាយ ហើយចំពោះលោក សម រង្ស៊ី ផ្ទាល់ គឺពុំមានកំហុសអ្វីនោះទេ ព្រោះក្នុងនាមជាតំណាងរាស្រ្ត និងជាពលរដ្ឋខ្មែរ គឺមានសិទ្ធិ ក្នុងការការពារបូរណភាពទឹកដីរបស់ខ្លួន ។
លោកបន្តថា "ហើយអ្វីដែលគាត់បានការពារបូរណភាពទឹកដី បែរជាត្រូវគេផ្តន្ទាទោស គឺជារឿងមួយ ដែលអយុត្តិធម៌សម្រាប់គាត់ " ។
សូមជម្រាប់ថា នៅព្រឹកថ្ងៃអង្គារ ទី២០ ខែកញ្ញា ឆ្នាំ២០១១ ចៅក្រមតុលាការសាលាឧទ្ធរណ៍ បានសម្រេចផ្តន្ទាទោស ដោយកាត់បន្ថយទោស ចំពោះមេដឹកនាំ គណបក្ស សម រង្ស៊ី គឺលោក សម រង្ស៊ី ដោយដាក់ពន្ធនាគារត្រឹមតែ ៧ឆ្នាំ និងពិន័យជាប្រាក់សរុបចំនួន ៦៣លានរៀល ពីបទក្លែងបន្លំឯកសារផែនទី ព្រំដែនកម្ពុជា-វៀតណាម ។
គួរំលឹកថា សំណុំរឿងផែនទីក្លែងក្លាយនោះ នៅតុលាការសាលាដំបូង កាលពីថ្ងៃទី២៣ ខែកញ្ញា ឆ្នាំ២០១០ ចៅក្រមបានផ្តន្ទាទោសកំបាំងមុខ ឲ្យលោក សម រង្ស៊ី ជាប់ពន្ធនាគារ ១០ឆ្នាំ និងពិន័យជាប្រាក់សរុបចំនួន ៦៥ លានរៀល ៕

Posted in: khmer news