7:44 PM
specialshowtoday
រាជធានីភ្នំពេញ ៖ អ្នកនាំពាក្យក្រសួងការបរទេសកម្ពុជា សូមឆ្លើយតបនឹងពាក្យសម្តីរបស់លោកកាស៊ីត ភីរម្យ ដែលសរសេរក្នុងអត្ថបទក្រោមចំណងជើងថា «កាស៊ីត ភីរម្យ វាយប្រហារហ៊ុន សែន ដែលបានជ្រៀតជ្រែក» ចុះផ្សាយក្នុងកាសែតបាងកកប៉ុស្តិ៍ នៅថ្ងៃទី២០ កញ្ញា ២០១១ ដូចតទៅ សម្តេចតេជោនាយករដ្ឋមន្ត្រីហ៊ុន សែន មិនដែលកាន់ជើងខាងគណបក្សភឿថៃ ឬក៏ជ្រៀតជ្រែកចូលកិច្ចការផ្ទៃក្នុងរបស់ប្រទេសថៃនោះឡើយ។ ជាការពិត កម្ពុជាមានសេចក្តីរីករាយចំពោះជ័យជម្នះរបស់គណបក្សភឿថៃ គឺព្រោះតែវាមានន័យថា ជាការបញ្ចប់នូវអំពើឈ្លានពានម្តងហើយម្តងទៀតមកលើកម្ពុជា ក្នុងពេលប៉ុន្មានឆ្នាំថ្មីៗនេះ ។ ទំនាក់ទំនងកម្ពុជា-ថៃ បានធ្លាក់ក្នុងសភាពជូរចត់ជាខ្លាំង ក្រោមរដ្ឋាភិបាលរបស់គណបក្សប្រជាធិបតេយ្យថៃ ។ លើសពីនេះទៅទៀត កម្ពុជាត្រូវរងការឈ្លានពានដោយអាវុធពីប្រទេសថៃ ជាបន្តបន្ទាប់ ក្នុងឆ្នាំ២០០៨ និង២០០៩ ហើយចុងក្រោយបំផុតនេះគឺនៅខែកុម្ភៈ និងខែឧសភា ឆ្នាំនេះតែម្តង។
ផ្ទុយទៅវិញ ដូចដែលកម្ពុជាបានបញ្ជាក់ហើយបញ្ជាក់ទៀត កម្ពុជាមិនដែលផ្តល់ជម្រកឱ្យមេដឹកនាំអាវក្រហម ឬក៏អនុញ្ញាតឱ្យគេប្រើទឹកដីកម្ពុជាប្រឆាំងនឹងប្រទេស ថៃនោះឡើយ ។ ការចោទប្រកាន់របស់លោកកាស៊ីត ថា «មេដឹកនាំអាវក្រហមជាច្រើននាក់ ដែលជាប់ទោសបង្កកុបកម្មនៅ បាងកក កាលពីខែឧសភា កន្លងទៅបានទៅជ្រកកោននៅកម្ពុជា ដោយមានហ៊ុន សែន ជាអ្នកជួយ» គឺជាការចោទប្រកាន់គ្មានមូលដ្ឋាន។ សម្តេចតេជោហ៊ុន សែន មិនដែលផ្តល់ជម្រកឱ្យមេដឹកនាំអាវក្រហមឡើយ។ ក៏ប៉ុន្តែសម្តេចតេជោហ៊ុន សែន មានសិទ្ធិពេញលេញក្នុងការទទួលស្វាគមន៍មិត្តផ្ទាល់ខ្លួនរបស់ សម្តេច និងអបអរសាទរចំពោះជ័យជម្នះរបស់គណបក្សភឿថៃ ។
រាជរដ្ឋាភិបាលកម្ពុជាដឹងច្បាស់ណាស់ថា តើត្រូវធ្វើអ្វីខ្លះដើម្បីបម្រើផលប្រយោជន៍របស់ប្រជាជន កម្ពុជា ហើយក៏មិនត្រូវការឱ្យមានជនណាមករំលឹកពីភារកិច្ចខ្លួន នោះទេ ពិសេសគឺមិនត្រូវការសោះតែម្តងនូវការក្រើនរំលឹកពី មនុស្សដូចលោកកាស៊ីត ។ លោកកាស៊ីត គួរតែរក្សាកម្លាំងរបស់ខ្លួន ដើម្បីទាក់ទាញការទុកចិត្ត និងជំនឿពីប្រជាជនថៃវិញ ។
ជាអវសាន លោកកាស៊ីត និយាយត្រូវណាស់ថា «យើងត្រូវសរសេរឡើងវិញនូវប្រវត្តិសាស្ត្រកម្ពុជា-ថៃ» ពីព្រោះយើងអាចបញ្ចូលនូវកំណត់ហេតុប្រវត្តិសាស្ត្រ ស្តីពីការឈ្លានពានយ៉ាងកម្រោលមកលើកម្ពុជាពីសំណាក់រដ្ឋាភិបាល ថៃ ដែលដឹកនាំដោយគណបក្សប្រជាធិបតេយ្យ។
អ្នកតាមដានសភាពការណ៍នយោបាយរបស់ប្រទេសថៃ បានលើកឡើងថា ចំណែកប្រទេសជប៉ុនឯណោះវិញ បានលុបចោលការហាមប្រាមលោកថាក់ស៊ីន ស៊ីណាវ៉ាត្រា នាយករដ្ឋមន្ត្រីថៃមិនឱ្យចូលប្រទេសជប៉ុន ឥឡូវនេះបានបើកចំហវិញហើយ មិនតែប៉ុណ្ណោះ ថែមទាំងស្វាគមន៍យ៉ាងកក់ក្តៅ ដល់លោកថាក់ស៊ីន អញ្ជើញទៅពិនិត្យមើលតំបន់រងគ្រោះដោយការរញ្ជួយដីទៀត ផង... ម៉េចមិនថា ប្រទេសជប៉ុនជ្រៀតជ្រែកកិច្ចការផ្ទៃក្នុងរបស់ប្រទេសថៃ ទៅ?
Posted in: khmer news
0 comments:
Post a Comment