Angkor Thom Media
15 October 2012
15 October 2012
ក្នុងកិច្ចប្រជុំ
អនុម័តលើសេចក្តីព្រាងច្បាប់ស្ដីពីការយល់ព្រមឲ្យកម្ពុជា
ចូលជាភាគីនៃអនុសញ្ញាស្ដីពីការជូនដំណឹងជាបន្ទាន់
ពីគ្រោះមហន្តរាយនុយក្លេអ៊ែរ
និងអនុសញ្ញាស្ដីពីសុវត្ថិភាពនុយក្លេអ៊ែរ
និងសេចក្តីព្រាងច្បាប់មួយចំនួនទៀតនៅថ្ងៃទី១៤ ខែវិច្ឆិកា
ឆ្នាំ២០១២ មានការប៉ះទង្គិចដោយពាក្យសម្ដី និងឈ្លោះប្រកែកគ្នា
យ៉ាងតឹងសរសៃក
រវាងតំណាងរាស្ត្រគណបក្សប្រឆាំង និងតំណាងរាស្ត្រគណបក្សកាន់អំណាច
ហើយតំណាងរាស្ត្រគណបក្សសម រង្ស៊ី
និងតំណាងរាស្ត្រគណបក្សសិទ្ធិមនុស្សជាង ២០នាក់
បានដើរចេញពីកិច្ចប្រជុំសភា។
ការឈ្លោះប្រកែកគ្នានោះ
បានកើតមានឡើងនៅពេលសម្តេចហេង សំរិន ប្រធានសភាជាតិ
បានអនុញ្ញាតឲ្យប្រធានគណបក្ស សិទ្ធិមនុស្ស លោកកឹម សុខា
ឡើងមានមតិជាលើកដំបូងនៅក្នុងសភា ដោយលោកបានលើកឡើងថា
សុំឲ្យអ្នកនយោបាយខ្មែររួបរួមគ្នាដូចបានលើកឡើងដោយ
ប្រធានសភាជាតិ លោក ហេង សំរិន នៅក្នុងរបាយការណ៍របស់លោក
ស្ដីពីសកម្មភាពរបស់សភាជាតិកន្លងមក
ហើយលោកបានសុំឲ្យគោរពសិទ្ធិមនុស្សនៅកម្ពុជា ឲ្យបានពេញលេញ
ដូចកាតព្វកិច្ចគោរពអនុសញ្ញាអន្តរជាតិដទៃទៀតដែរ។
ពេលនោះ សម្តេចហេង សំរិន បានតបវិញថា
យើងបានបង្រួបបង្រួមជាតិរហូត តាំងពីនោះមក រហូតដល់បច្ចុប្បន្ននេះ។
យើងបង្រួបបង្រួមហើយ អង្គុយជាមួយគ្នានេះហ្នឹង
មិនបង្រួបបង្រួមជាតិ?
ប៉ុន្តែចំពោះបុគ្គលដែលប្រព្រឹត្តបទល្មើសព្រហ្មទណ្ឌ
មិនអាចរួបរួមបានទេ។
ក្រោយមក លោកឈៀង វុន
តំណាងរាស្ត្រគណបក្សប្រជាជនកម្ពុជា បានឡើងតបថា ឥរិយាបថ
និងពាក្យសម្ដីរបស់តំណាងរាស្ត្របក្សប្រឆាំង ប្រៀបបានជាមនុស្សព្នង
ព្រៃផ្សៃ និងជាមនុស្សបោកប្រាស់ប្រជាពលរដ្ឋ។ គណបក្សឯកឧត្តម
ដែលគ្មានការគាំទ្រពីប្រជាពលរដ្ឋ ទទួលបានសំឡេងតែ ៣អាសនៈ
មិនគ្រប់បង្កើតក្រុមបាន អីចឹងហើយឯកឧត្តមអត់មានសិទ្ធិនិយាយ
ដោយសារតែប្រជាពលរដ្ឋមិនគាំទ្រ។
នៅពេលដែលលោកឈៀង វុន
កំពុងតែមានមតិដូច្នេះ តំណាងរាស្ត្រគណបក្សសម រង្ស៊ី
និងគណបក្សសិទ្ធិមនុស្ស បានដើរចេញពីកិច្ចប្រជុំសភាជាតិតែម្តង ។
ក្រុមអ្នកតំណាងរាស្រ្តពីគណបក្ស
ប្រឆាំងសមរង្ស៊ី និងគណបក្សសិទ្ធិមនុស្សបានឲ្យដឹងថា
ការសម្រេចដើរចេញពីកិច្ចប្រជុំរដ្ឋសភាពាក់កណ្តាលទីកាលពីព្រឹក
មិញ
គឺដោយសារតែតំណាងរាស្រ្តមកពីគណបក្សប្រជាជនកម្ពុជាកំពុងកាន់
អំណាច បានប្រើពាក្យអសុរោះ ប្រមាថ ដល់អ្នកតំណាងរាស្រ្ត
និងជនជាតិភាគតិច។
ក្រុមអ្នកតំណាងរាស្រ្តគណបក្សប្រឆាំង
ទាំងពីរបានរៀបរាប់នៅក្នុងសេចក្តីថ្លែងការណ៍ចុះថ្ងៃទី១៤
ខែវិច្ឆិកា នេះថា ខណៈដែលលោក កឹម សុខា តំណាងរាស្រ្តមណ្ឌលកំពង់ចាម
ប្រធានគណបក្សសិទ្ធិមនុស្ស និងជាអនុប្រធានចលនាសង្រ្គោះជាតិ
ឡើងសម្តែងមតិលើកដំបូងក្នុងសម័យប្រជុំពេញអង្គរដ្ឋសភា
ក្នុងគោលបំណងឲ្យរដ្ឋសភាខ្មែរបំពេញការងាររបស់ខ្លួនដោយមានការ
ទទួលខុសត្រូវ និងការរួបរួមជាតិពិតប្រាកដ
ក្នុងនាមជាអ្នកតំណាងឲ្យប្រជាជាតិខ្មែរទាំងមូល,
តំណាងរាស្រ្តរបស់គណបក្សប្រជាជនកម្ពុជាបានបញ្ចេញប្រតិកម្មមកវិញ
ដោយប្រើពាក្យអសុរោះ
ប្រមាថមើលងាយដល់អ្នកតំណាងរាស្រ្តគណបក្សប្រឆាំង
និងបងប្អូនជនជាតិភាគតិច ដូចជា ប្រើពាក្យថា
«តំណាងរាស្រ្តគណបក្សប្រឆាំងព្រៃផ្សៃដូចពួកព្នង» ជាដើម។ ដូច្នេះ
តំណាងរាស្រ្តគណបក្សសមរង្ស៊ី និងគណបក្សសិទ្ធិមនុស្ស
មិនអាចទទួលយកបានទេនូវពាក្យអសុរោះ ប្រមាថមើលងាយបែបនេះ
ពីសំណាក់តំណាងរាស្រ្តគណបក្សកាន់អំណាច
ទើបតំណាងរាស្រ្តគណបក្សប្រឆាំងសម្រេចចិត្តដើរចេញពីអង្គប្រជុំសភា
ក្នុងគោលបំណងចង់ឲ្យរដ្ឋសភាធ្វើការពិចារណាឡើងវិញ
និងកែសម្រួលឲ្យការចូលរួមសម្តែងមតិរបស់អ្នកតំណាងរាស្រ្តប្រកប
ដោយសេចក្តីថ្លៃថ្នូរ ស្មើមុខ ក្នុងនាមជាអ្នកតំណាងរាស្រ្ត
មិនមែនជាអ្នកតំណាងបក្ស ដើម្បីផលប្រយោជន៍រួម គឺ ជាតិ
និងប្រជាពលរដ្ឋខ្មែរ។
តំណាងរាស្ត្របក្សសម រង្ស៊ី
ទាមទារឲ្យលោក ឈៀង វុន សុំទោសនៅក្នុងសភាជាតិ ដោយលាយលក្ខណ៍អក្សរ
ឬផ្ទាល់មាត់។ ឯលោកកឹម សុខា ទាមទារឲ្យលោកឈៀង វុន
សុំទោសបងប្អូនជនជាតិភាគតិច ព្រោះលោកឈៀង វុន បានប្រើពាក្យថា
«តំណាងរាស្រ្តគណបក្សប្រឆាំងព្រៃផ្សៃដូចពួកព្នង»
។នេះជាការប្រមាថចំពោះបងប្អូនជនជាតិភាគតិច។ ប៉ុន្តែ លោកឈៀង វុន
តំណាងរាស្ត្រគណបក្សប្រជាជនកម្ពុជា បានបញ្ជាក់ថា លោកមិនសុំទោសទេ
ពីព្រោះលោកមិនបានធ្វើអ្វីខុស គឺតំណាងរាស្ត្របក្សប្រឆាំងទេ
ដែលបានល្មើសបទបញ្ជាផ្ទៃក្នុងរបស់សភាជាតិ
ដែលហាមឃាត់មិនឲ្យស្រែកឡូឡាក្នុងសភាជាតិ។
ទោះបីជាយ៉ាងណាក្តី ក៏លោក សុន ឆ័យ
តំណាងរាស្ត្រគណបក្សសម រង្ស៊ី បានអះអាងថានៅថ្ងៃទី១៥ ខែវិច្ឆិកានេះ
តំណាងបក្សប្រឆាំងនឹងចូលរួមប្រជុំសភាជាតិ
ដើម្បីអនុម័តលើសេចក្តីព្រាងច្បាប់ថវិកា ឆ្នាំ២០១៣
និងសេចក្តីព្រាងច្បាប់មួយចំនួនទៀត៕
0 comments:
Post a Comment