លោក ទូច ណារ៉ុថ (ឆ្វេង) និង លោកទា បាញ់ នៅស្ពានកោះពេជ្រក្រោយពេលកើតហេតុ។ រូបថត ហេង ជីវ័ន |
ភ្នំពេញៈ
លោកនាយករដ្ឋមន្រ្តី ហ៊ុន សែន បានគំរាមកាលពីម្សិលមិញថា
នឹងប្តឹងតបប្រឆាំងនឹងមេដឹកនាំចលនាយុវជននៃគណបក្ស សម រង្ស៊ី
ដែលជាគណបក្សប្រឆាំង ដែលចោទថា
លោកនាយករដ្ឋមន្រ្តី
និងមន្រ្តីរដ្ឋាភិបាលជាន់ខ្ពស់បីនាក់ផ្សេងទៀតទទួលខុសត្រូវចំពោះ
ឧបទ្ទវហេតុជាន់គ្នាស្លាប់ នៅស្ពានពេជ្រកាលពី ខែវិច្ឆិកា ឆ្នាំ
២០១០ ។
ថ្លែងទៅកាន់អ្នកភូមិជាង ៤០០ នាក់
នៅក្នុងខេត្តព្រះសីហនុ
ក្នុងអំឡុងពិធីប្រគល់ប័ណ្ណកម្មសិទិ្ធដីធ្លីជូនប្រជាពលរដ្ឋ
លោកនាយករដ្ឋមន្រ្តីមានប្រសាសន៍ថា យុវជនម្នាក់ ពីគណបក្សនយោបាយមួយ
បានដាក់ពាក្យបណ្តឹងប្រឆាំងរូបលោក និងមន្រ្តីជាន់ខ្ពស់ផ្សេងទៀត
រួមមានលោក គង់ សំអុល រដ្ឋមន្រ្តីក្រសួងព្រះបរមរាជវាំង លោក កែប
ជុតិមា អភិបាលរាជធានីភ្នំពេញនិងលោក ទូច ណារ៉ុថ អតីតស្នងការនគរបាល
រាជធានី ភ្នំពេញ។ លោក ហ៊ុន សែន បានបញ្ជាក់ថា
លោកនឹងមិនជ្រៀតជ្រែកក្នុងនីតិវិធីតុលាការ និងឯករាជភាព
របស់តុលាការឡើយ ។ លោកបានមានប្រសាសន៍ថា៖ «តាងនាមជាពលរដ្ឋ ម្នាក់
ខ្ញុំនឹងប្រើសិទិ្ធប្តឹងតប ប្រសិនបើតុលាការ
នឹងមិនរកឃើញកំហុសរបស់ខ្ញុំ ។ វាចាំបាច់ត្រូវការការពារកិត្តិយស
និងសេចក្តីថ្លៃថ្នូររបស់ខ្ញុំ ក៏ដូចជាសេចក្តីថ្លៃថ្នូរ
និងកិត្តិយសរបស់រដ្ឋាភិបាល»។
លោកនាយករដ្ឋមន្រ្តី បានថ្លែងថា កាល
ពីថ្ងៃសុក្រ យុវជនម្នាក់ បានដាក់ពាក្យបណ្តឹងប្រឆាំងរូបលោក
ហើយបានចោទពីបទមនុស្សឃាតគិតទុកជាមុន លើមនុស្ស ៣៥៣ នាក់
ដែលបានចូលរួមក្នុងពិធីបុណ្យអុំទូក កាលពីឆ្នាំ ២០១០
ដែលស្លាប់ក្នុងឧប្បតិ្តហេតុជាន់គ្នា លើស្ពានកោះពេជ្រ។
លោក ហ៊ុន សែន បានបន្តថា៖ «
ប្រសិនបើហ៊ុន សែន ជាប់ពន្ធនាគារ
មន្រ្តីរដ្ឋាភិបាលជាន់ខ្ពស់ដទៃទៀត ក៏នឹងជាប់ពន្ធនាគារផងដែរ
ជាពិសេស រដ្ឋមន្រ្តីក្រសួងមហាផ្ទៃ»។
លោកបានព្រមានថា ចំពោះបណ្តឹងតបរបស់លោក គណបក្សប្រឆាំង
មិនត្រូវផ្សារភ្ជាប់រឿងក្តីតុលាការថា ស្ថិតក្រោមសម្ពាធនយោបាយឡើយ
។ លោក ហ៊ុន សែន បានថ្លែងថា៖ «វាច្បាស់ថា ពេលនោះ
គ្មានសម្ពាធនយោបាយទេ ដោយសារយុវជនម្នាក់អាយុប្រហែល ២០ ឆ្នាំ
និងប្រធានគណបក្សនយោបាយមួយ
បានដាក់ពាក្យបណ្តឹងប្រឆាំងនាយករដ្ឋមន្រ្តីប្រទេសមួយ
នេះជាសិទិ្ធរបស់យុវជន ប៉ុន្តែ [អ្នក]
ត្រូវគិតអំពីសិទិ្ធរបស់អ្នកដទៃ ។ [ប្រសិនបើខ្ញុំ] ផ្តាច់ការ
មិនអនុញ្ញាតឲ្យករណីនេះទៅតុលាការ ដូច ប៉ុល ពត
មិនដែលអនុញ្ញាតទៅតុលាការឡើយ ប៉ុន្តែ ខ្ញុំមិននិយាយច្រើនទេ
ព្រោះវាអាចជះឥទិ្ធពលលើឯករាជភាពរបស់តុលាការ»។
យុវជន សួង សុភ័ន អាយុ ២៥ ឆ្នាំ
ជាប្រធានចលនាយុវជននៃគណបក្ស សម រង្ស៊ី បានប្រាប់ ភ្នំពេញ ប៉ុស្តិ៍
កាលពីម្សិលមិញថា លោកបានដាក់ពាក្យបណ្តឹងទៅតុលាការតាំងពីថ្ងៃទី
៣០ ខែវិច្ឆិកា ដោយចោទ លោក ហ៊ុន សែន លោក ទូច ណារ៉ុថ លោក កែប ជុតិមា
និងលោក គង់ សំអុល ពីបទគ្រោងប៉ុនប៉ងធ្វើមនុស្សឃាតនៅកោះពេជ្រ ។
លោក សុភ័ណ បានបន្តថា៖ «
ខ្ញុំមិនភ្ញាក់ផ្អើលទេ ចំពោះពាក្យបណ្តឹងតប
ដោយលោកនាយករដ្ឋមន្រ្តី ហើយខ្ញុំនឹងឈរនៅតុលាការដោយខ្លួនខ្ញុំ
គ្មានមេធាវី ដើម្បីតបទល់ ប្រសិនបើលោកនាយករដ្ឋមន្រ្តី ហ៊ានឈរ
ក្នុងតុលាការជាមួយខ្ញុំ ខ្ញុំមិនខ្លាចទេ»។
លោកបានបន្តទៀតថា៖«ខ្ញុំត្រូវចាត់វិធានការតាមផ្លូវច្បាប់
ដើម្បីរកយុតិ្តធម៌ឲ្យមនុស្ស ៣៥៣ នាក់ ដែលស្លាប់ និង ៣៩៣
នាក់ដែលរងរបួសនៅកោះពេជ្រកាលពីឆ្នាំ២០១០»។
លោក ក៏បានលើកឡើងផងដែរថា
លោកនឹងធ្វើដំណើរទៅប្រទេសហូឡង់នៅខែធ្នូ
ដើម្បីដាក់ពាក្យបណ្តឹងដដែល ទៅតុលាការព្រហ្មទណ្ឌអន្តរជាតិ។ លោក
សុភ័ណ បានបន្តថា៖
«ខ្ញុំកំពុងរង់ចាំទិដា្ឋការពីស្ថានទូតបារាំង»។
លោក ផល ខាន់ អាយុ ៥៤ ឆ្នាំ
ដែលមានកូនប្រុសបានស្លាប់ក្នុងឧប្បតិ្តហេតុជាន់គ្នា នៅកោះពេជ្រ
បានថ្លែងកាលពីម្សិលមិញថា លោកមិនបានដឹងពីបញ្ហាច្បាប់ទេ។
ប៉ុន្តែយ៉ាងណាក្តី លោក បញ្ជាក់ថា៖
«ខ្ញុំបានទទួលយុតិ្តធម៌ឲ្យកូនប្រុសខ្ញុំរួចហើយ ព្រោះរដ្ឋាភិបាល
បានបង់សងខ្ញុំរួចហើយ។ វាជាសំណាងមិនល្អរបស់កូនប្រុសខ្ញុំ»។
លោក យឹម សុវណ្ណ អ្នកនាំពាក្យនៃគណបក្ស
សម រង្ស៊ី
បានបដិសេធមិនផ្តល់ការអត្ថាធិប្បាយអំពីពាក្យបណ្តឹងដែលដាក់ដោយ
លោក សុភ័ណទេ ព្រោះវាជាបញ្ហាបុគ្គល មិនមែនតាងនាមឲ្យគណបក្សឡើយ។
លោក ទិត្យ សុធា អ្នកនាំពាក្យអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្រ្តី បានថ្លែង កាលពីម្សិលមិញថា ប្រជាពលរដ្ឋមានសិទិ្ធដាក់ពាក្យបណ្តឹងប្រឆាំងនរណាម្នាក់ ប៉ុន្តែបុគ្គលនោះ ត្រូវពិចារណាអំពីភស្តុតាង និងច្បាប់។ លោក ទិត្យ សុធា បានបន្ថែមថា៖ «នេះជា [ពាក្យបណ្តឹងដាក់ដោយយុវជន] គ្មានមូលដ្ឋានច្បាប់។ ខ្ញុំគិតថា ពាក្យបណ្តឹងនេះខុស ហើយជាចលនាជ្រុលនិយម ដើម្បីបង្កើតចលាចលក្នុងសង្គម»។
លោក ជីវ កេង ប្រធានសាលាដំបូងរាជធានីភ្នំពេញ មិនអាចទាក់ទងសុំការអត្ថាធិប្បាយបានទេ កាលពីថ្ងៃអាទិត្យ៕ TK
0 comments:
Post a Comment