ការដោះលែងចារកម្មថៃជាការបញ្ចប់ទំនោរជាតិនិយមឬចុះញ៉ម? ~ khmer news

Wednesday, 16 January 2013
កាន់ វីរៈ
The Phnom Penh Post

គោរពជូនលោកការីនិពន្ធ

លោក សម រង្ស៊ី និងលោក ម៉ម សូណង់ដូ ជាស្អី? ហើយលោក វរៈស៊ុមខ្វាមឃីត និង អ្នកស្រីណាទ្រីពីប៉ាតាណាប៉ៃប៊ូន គឺជាស្អី ?

តើហេតុនិងផលសមឬទេ? នៅពេលដែលមន្ត្រីរដ្ឋាភិបាល អះអាងថា ចារបុរសនិងចារនារីជនជាតិបរទេស ដែលមានទោសពីបទធ្វើចារកម្ម ត្រូវបានលើកលែង និងបន្ធូរបន្ថយទោសព្រោះតែហេតុផលមនុស្សធម៌ ក្នុងពេលខ្មែរគ្នា ឯង បែរជាពុំមានវាសនាបានទទួលនូវពាក្យថា មនុស្សធម៌ពីប្រមុខរដ្ឋាភិបាលដែលជាខ្មែរគ្នាឯងនោះ!

បើប្រៀប ធៀបរវាងលោក សម រង្ស៊ី និងលោក ម៉ម សូណង់ដូ ដែលជាខ្មែរ ជាមួយលោក វរៈស៊ុមខ្វាមឃីត និងអ្នកស្រី ណាទ្រីពីប៉ាតាណា ប៉ៃប៊ូន ដែលជាជនជាតិបរទេស មួយណាគ្រោះថ្នាក់ដល់ប្រទេសជាតិជាង? តើខ្មែរដែលធ្វើអ្វីព្រោះតែបារម្ភពីបញ្ហាជាតិ និងមិនដែលមានប្រវត្តិលក់ជាតិឲ្យជាតិដទៃ ពិតជាមានគ្រោះថ្នាក់ចំពោះជាតិ ជាងជនជាតិថៃ ដែលមកធ្វើចារកម្មដើម្បីប្រយោជន៍ជាតិគេមែនទេ?តើប្រាកដទេថា ព្រះវិញ្ញាណក្ខន្ធរបស់អតីតព្រះមហាវីរក្សត្រ នឹងសព្វព្រះរាជហឫទ័យនៅពេលដែល ព្រះវិញ្ញាណក្ខន្ធព្រះអង្គដឹងថា ជនជាតិបរទេសដែលមកធ្វើចារកម្មនៅស្រុកខ្មែរដែលអាចបង្កគ្រោះ ថ្នាក់ដល់ជាតិខ្មែរបែរជារួចខ្លួន ឯជនជាតិខ្មែរគ្នាឯងដែលមិនបង្កគ្រោះថ្នាក់ដល់ជាតិ បែរជាមិនរួចខ្លួននោះ?

មន្ត្រីរដ្ឋាភិបាលអះអាងថា ការលើកលែង និងបន្ធូរបន្ថយទោសឲ្យជនជាតិថៃ វរៈស៊ុមខ្វាមឃីត និងណាទ្រីពីប៉ាតាណាប៉ៃប៊ូន ក្រៅពីហេតុផលមនុស្សធម៌ គឺដោយសារជនបរទេសទាំងពីរនាក់នេះ បានជាប់ទោស២ភាគ៣ រួចហើយ និងមិនកំពុងស្ថិតនៅក្នុងដំណើរក្តីតុលាការ។ ប៉ុន្តែបើយោងតាមការវិនិច្ឆ័យ លោកស្រី ណាទ្រី ពីប៉ាតាណាប៉ៃប៊ូន ត្រូវបានកាត់ឲ្យមានទោសចំនួន៦ ឆ្នាំ បើគិតរយៈពេលដែលជនទាំងពីរនាក់ត្រូវបានចាប់ខ្លួននៅ ក្នុងខែធ្នូ ឆ្នាំ ២០១០ ឃើញថា ទាំង វរៈស៊ុមខ្វាមឃីត និង ណាទ្រីពីប៉ាតាណាប៉ៃប៊ូន ទើបតែជាប់ឃុំបានចំនួន ២ឆ្នាំនិងប៉ុន្មានថ្ងៃតែប៉ុណ្ណោះ គឺស្មើនឹង១ភាគ៣ នៃទោសដែលត្រូវជាប់ ហេតុនេះមិនទាន់គ្រប់ចំនួន២ភាគ៣ នៃទោសដូចដែលមន្ត្រីរដ្ឋាភិបាលបានអះអាងនោះទេ ។

ការ ស្នើ (ស្មើនឹងបញ្ជា) ឲ្យក្រសួងយុត្តិធម៌ពិចារណាការដោះលែងជនជ្រុលនិយមជាតិថៃរបស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺជាភស្តុតាងគ្រប់គ្រាន់ណាស់ ដើម្បីបញ្ជាក់ថា រដ្ឋាភិបាលមានអំណាច លើតុលាការបើទោះបីជារដ្ឋាភិបាលបដិសេធម្តងហើយម្តងទៀតថា ខ្លួនមិនអាចជ្រៀតជ្រែកកិច្ចការផ្ទៃក្នុងតុលាការក៏ដោយ ហើយនេះ ជាលើកទី ២ ហើយបន្ទាប់ពីលើកទី១ នៅក្នុងឆ្នាំ២០០៩ ដែលរដ្ឋាភិបាលបានស្នើព្រះមហាក្សត្រ ព្រះរាជទានលើកលែងទោសឲ្យជនចារកម្មជាតិថៃឈ្មោះ ស៊ីវ៉ារាក់ ចូទិពង្ស ដែលជាប់ពន្ធនាគារត្រឹមតែ១១ ថ្ងៃ ក្នុងរយៈពេលនៃ ទោស៧ឆ្នាំនោះ។

ការ ចចេសដាក់ទោសខ្មែរគ្នាឯង ដែលមិនបង្កគ្រោះថ្នាក់ចំពោះជាតិ និងការលើកលែងទោសឲ្យពួកចារកម្មថៃគឺដើម្បីបន្ថយទម្ងន់នៃបញ្ហា នៅក្នុងប្រទេសថៃឲ្យលោកស្រី យីងឡាក់ ស៊ីណាវ៉ាត្រា ប្អូនអតីតនាយករដ្ឋមន្ត្រីថៃ ថាក់ស៊ីន ព្រោះដោយសារតែការទទួលគំនាបពីពួកអាវលឿង វាបង្ហាញឲ្យឃើញថាសម្តេចនាយករដ្ឋមន្ត្រីខ្មែរ យកចិត្តទុកដាក់ ព្រួយបារម្ភណាស់ពីសុខទុក្ខ និងវាសនារបស់ប្រទេសថៃ វាផ្ទុយពីខ្មែរ ដែលសម្តេចនាយករដ្ឋមន្ត្រី មិនសូវរវីរវល់ ឬក៏ទង្វើរបស់រដ្ឋាភិបាល គឺដើម្បីជាថ្នូរនឹងសុវត្ថិភាពរបស់ប្រទេសខ្មែរ?ឬក៏ដើម្បីទទួលបានការយោគយល់ពីពួកអាវលឿង?

ថៃ សរសើរនាយករដ្ឋមន្ត្រីខ្មែរដែលបានជួយដោះទុក្ខឲ្យប្រទេសថៃមួយ គ្រា ក្នុងពេលដែលនាយករដ្ឋមន្ត្រីខ្មែរ សុខចិត្តទទួលការរិះគន់ ពីប្រជាជនខ្មែរ និងសហគមន៍អន្តរជាតិ ចំពោះករណី លោក សម រង្ស៊ី និងលោក ម៉ម សូណង់ដូ។ កម្ពុជា គឺជាប្រទេសមានអធិបតេយ្យ គ្មាននរណា ឬបរទេសណាអាចមកបង្គាប់បញ្ជាបានទេ ប៉ុន្តែបើប្រទេសថៃ ឬវៀតណាម អាច មិនបាច់បង្គាប់ បញ្ជាក៏ព្រមដែរ គឺដើម្បីសម្តែងភក្តីភាព ឬឆន្ទៈល្អក្នុងនាមជាប្រទេសជិតខាង? តើការដោះលែង និងបម្រុងដោះលែងលើចារកម្មថៃទាំងពីរនាក់ នឹងបញ្ចប់នូវទំនោរជាតិនិយមជ្រុលរបស់ពួកអាវលឿងទេ? ឬក៏នាយករដ្ឋមន្ត្រីខ្មែរ នឹងត្រូវលះបង់អ្វីមួយទៀត នៅពេលខាងមុខ(ការបកស្រាយសាលក្រមតុលាការអន្តរជាតិនាខែមេសា)?

ជា ការពិត ទង្វើរបស់សម្តេចនាយករដ្ឋមន្ត្រី ហ៊ុន សែន ក្នុងការដោះលែង ឬបម្រុងដោះលែងនូវចារកម្មថៃទាំងពីរនាក់នេះ គឺជាកាយវិការមនុស្សធម៌ និងជាឆន្ទៈល្អរបស់កម្ពុជា ជាមួយប្រទេសជិតខាង ដែលធ្លាប់ស្អប់ខ្មែរ និងធ្វើបាបខ្មែរនេះ ប៉ុន្តែតើវាពិតជាលំបាកណាស់ឬប្រសិនបើសម្តេចនាយករដ្ឋមន្ត្រី សម្តែងកាយវិការល្អបែបនេះ ចំពោះលោក សម រង្ស៊ី និងលោក ម៉ម សូណង់ដូ នោះ? ខ្ញុំជឿថា សម្តេចនាយករដ្ឋមន្ត្រី ហ៊ុន សែន នឹងប្រាកដជាទទួលបានការគោរពនិងស្រឡាញ់កាន់តែច្រើនថែមទៀត ពីសំណាក់ប្រជាជនខ្មែរនិងពីសហគមន៍អន្តរជាតិ ប្រសិនបើសម្តេចលើកលែងនិងអនុគ្រោះឲ្យខ្មែរទាំងពីររូប នោះ។ អំពើល្អ និងការអនុគ្រោះរបស់សម្តេចនាយករដ្ឋមន្ត្រីប្រសិនបើពុំបានទទួល ការគោរព ឬដឹងគុណពីបុគ្គលនោះ ក៏ប្រជាជនខ្មែរ ដឹង និងចងចាំជានិច្ចដែរ៕

Posted in: khmer news

khmer news

Freedom of news in the world ,wanted to show the problem in the societies

ខ្មែរស្រឡាញ់ខ្មែរចេះជួយខ្មែរនោះប្រទេសរបស់យើងអាចរីកចំរើនបាន

Cambodia's Tourism Attraction

My Friend Blog List

Here ! Computer Technique for you

Wednesday, January 16, 2013