តំណាង គ.ជ.ប. ទទួលញត្តិរបស់គណបក្សសង្គ្រោះជាតិ នៅទីលានប្រជាធិបតេយ្យ ~ khmer news

ថ្ងៃទី 24 មេសា 2013

ដោយ: មុនីរាជ

Cambodia Express News

ភ្នំពេញ: បន្ទាប់ ពីជួបជុំថ្លែងការណ៍ នៅទីលានប្រជាធិបតេយ្យ ដើម្បីធ្វើបាតុកម្មរបស់គណបក្សសង្គ្រោះជាតិ គឺនៅវេលាម៉ោង ១០ ព្រឹក ថ្ងៃទី២៤ ខែមេសា ឆ្នាំ២០១៣ តំណាង គ.ជ.ប. មកទទួលយកញត្តិរបស់គណបក្សប្រឆាំងនេះនៅកន្លែងធ្វើបាតុកម្មតែម្តង។ គណបក្សប្រឆាំងក៏បានរំសាយ ដោយមិនដើរហែក្បួនបាតុកម្ម ដូចការប្រកាសឡើយ។
ក្នុងញត្តិ ២ទំព័រ របស់គណបក្សសង្គ្រោះជាតិ ដាក់ទៅកាន់ គ.ជ.ប. មាន ៤ ចំណុច ដើម្បីទាមទារឲ្យស្ថាប័នរៀបចំការបោះឆ្នោតមួយនេះទទួលយកអនុសាសន៍នានារបស់តំណាងអង្គការសហប្រជាជាតិ និងអនុសាសន៍ពីអង្គការសង្គមស៊ីវិល ជុំវិញដំណើរការរៀបចំការបោះឆ្នោតជាតិនៅខែកក្កដាខាងមុខ។ គណបក្សប្រឆាំង ក៏បានទាមទារឲ្យគ.ជ.ប. អនុវត្តន៍ច្បាប់ដោយឯករាជ្យ ដើម្បីធានាដល់ការបោះឆ្នោតខាងមុខប្រព្រឹត្តទៅដោយសេរី ត្រឹមត្រូវ និងយុត្តិធម៌ ដែលអាចទទួលយកបាន។ល។ និង។ល។

ញត្តិទាំង ៤ចំណុច របស់គណបក្សសង្គ្រោះជាតិ ដាក់ទៅកាន់ គ.ជ.ប. រួមមាន៖
ទី១- គាំទ្រយ៉ាងពេញទំហឹងនូវអនុសាសន៍អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធមនុស្សនៅកម្ពុជា កាលពីឆ្នាំ២០១២ ជុំវិញការបោះឆ្នោតនីតិកាលទី៥ ឆ្នាំ២០១៣។

ទី២- ទាមទារឲ្យសើរើ ធ្វើឡើងវិញនូវបញ្ជីឈ្មោះ អ្នកបោះឆ្នោតដែល គ.ជ.ប. បានធ្វើ។ ខាងអង្គការ NDI និងអង្គការខមហ្វ្រេល រកឃើញកំហុសយ៉ាងធ្ងន់ធ្ងរ ដូចជាការបំប៉ោង ការបំបាត់ឈ្មោះ អ្នកបោះឆ្នោតនីតិកាលទី៥នេះ។ បើក្នុងករណី គ.ជ.ប. ឆ្លើយថា ធ្វើមិនទាន់ គួរតែពន្យាពេលបោះឆ្នោតមួយរយៈខ្លី ត្រឹមមួយខែឬ ពីរខែ ឬក៏អាចធ្វើបញ្ជីឈ្មោះ ជាថ្មីឡើងវិញ។
ទី៣- អំពាវនាវឲ្យសហគមន៍អន្តរជាតិ ជាពិសេសបណ្តាប្រទេស ហត្ថលេខីកិច្ចព្រមព្រៀងទីក្រុង ប៉ារីស សូមឲ្យធ្វើការគាបសង្កត់ទៅលើ រាជរដ្ឋាបាល ឲ្យបានច្បាស់លាស់ ចំពោះការរៀបចំ ការបោះឆ្នោត ឆ្នាំ២០១៣នេះ ឲ្យមានលក្ខណៈសេរីត្រឹមត្រូវ និងយុត្តិធម៌ ដែលអាចទទួលយកបាន។
ទី៤- ត្រូវតែអនុញ្ញាតិដោយគ្មានលក្ខ័ណ នូវការវិញត្រឡប់ដោយសុវត្ថិភាព ព្រមទាំងការចូលរួមដោយសេរី និងយុត្តធម៌ របស់មេដឹកនាំ គណបក្សប្រឆាំងនៅពេលបោះឆ្នោត ខែកក្កដា ឆ្នាំ២០១៣
ជាមួយនឹងសំណើខាងលើ គណបក្សប្រឆាំង ក៏បានប្រកាសព្រមានថា ក្នុងករណី គ.ជ.ប. និងរាជរដ្ឋាភិបាល មិនទទួលយកអនុសាសន៍របស់អង្គការសហប្រជាជាតិ និងអង្គការជាតិអន្តរជាតិ ព្រមទាំងគណបក្សនយោបាយ ដើម្បីរៀបចំការបោះឆ្នោត ឲ្យបានសេរី ត្រឹមត្រូវ និងយុត្តិធម៌ទេ

នោះគណបក្សប្រឆាំង ទាមទារឲ្យសហគមន៍អន្តរជាតិ មិនត្រូវទទួលស្គាល់ការបោះឆ្នោតដែលគណបក្សសង្គ្រោះជាតិ ហៅថា មិនស្របច្បាប់ ដែលបានដកហូតនូវសិទ្ធិរបស់ប្រជាពលរដ្ឋខ្មែរ។ គណបក្សសង្គ្រោះជាតិ ក៏បានទាមទារឲ្យសហគមន៍អន្តរជាតិ មិនត្រូវទទួលស្គាល់រាជរដ្ឋាភិបាល ដែលកើតចេញពីការបោះឆ្នោត ដែលមិនស្របច្បាប់នោះ។

គណបក្សសង្គ្រោះជាតិ ក៏បានអំពាវនាវដល់ គ.ជ.ប. និងរាជរដ្ឋាភិបាលកម្ពុជា ឲ្យទទួលយកការទាមទាររបស់ខ្លួន ដើម្បីឲ្យការបោះឆ្នោតនីតិកាលទី ៥ មានលក្ខណៈប្រជាធិបតេយ្យ សេរី ត្រឹមត្រូវ និងយុត្តិធម៌ ដែលមានសារសំខាន់ ចាំបាច់សម្រាប់ស្ថិរភាព និងសន្តិភាពរបស់ប្រជាជាតិយើង។
មិនទាន់មានអត្ថាធិប្បាយបែបណាពីគ.ជ.ប. និងរាជរដ្ឋាភិបាល ជុំវិញញត្តិ និងការធ្វើបាតុកម្មរបស់គណបក្សប្រឆាំង នៅព្រឹកថ្ងៃទី២៤មេសា នៅឡើយទេ។
ជាការកត់សម្គាល់ នៅព្រឹកព្រលឹមថ្ងៃទី២៤មេសា ឆ្នាំ២០១៣ នៅទីលានប្រជាធិបតេយ្យ សកម្មជនគណបក្សសង្គ្រោះជាតិ ដែលជាគណបក្សប្រឆាំងរួបរួមរវាង គណបក្សសមរង្ស៊ី និងគណបក្សសិទ្ធិមនុស្ស ប្រមាណ ២០០ ទៅ ៣០០ នាក់ បានជួបជុំធ្វើបាតុកម្ម ដោយលើកបដា និងថ្លែងការណ៍តាមមេក្រូយ៉ាងកងរំពង ដើម្បីទាមទារឲ្យមានការកែទម្រង់ គ.ជ.ប. សម្រាប់រៀបចំការបោះឆ្នោតជាតិ នៅខែកក្កដាខាងមុខ។
ចំនួនអ្នកធ្វើបាតុកម្មរបស់គណបក្សសង្គ្រោះជាតិ ដែលមានចំនួនតិចជាងការគ្រោងទុកពីដំបូងថា មានដល់ទៅ ៤០០០ នាក់ ត្រូវបានគណបក្សប្រឆាំងអះអាងថា មកពីសកម្មជនរបស់ខ្លួនត្រូវបានអាជ្ញាធរឃាត់តាមផ្លូវសំខាន់ៗ ចូលមកកាន់ទីក្រុងភ្នំពេញ។
សូមរម្លឹកថា បាតុកម្មរបស់គណបក្សប្រឆាំងនៅព្រឹកនេះ មានការចូលរួមពីថ្នាក់ដឹកនាំគណបក្ស សង្គ្រោះជាតិ គណបក្សសមរង្ស៊ី និងគណបក្សសិទ្ធិមនុស្ស ដែលរួមមាន៖ លោក កឹមសុខា លោក ប៉ែន សុវណ្ណ លោក គង់ គាំ ព្រះអង្គម្ចាស់ ស៊ីសុវត្ថិ ធម្មិកោ និងថ្នាក់ដឹកនាំគណបក្សប្រឆាំងជាច្រើនរូបផ្សេងទៀត។
រីឯសកម្មជនគណបក្សប្រឆាំង ដែលចូលរួមបាតុកម្ម ក្រៅពីលើកបដា ក៏មានចងក្បាលនឹងក្រណាត់ស សរសេរអក្សរ ដែលមានការទាមទារកែទម្រង់ គ.ជ.ប. ជាដើម។
បន្ទាប់ពីឡើងថ្លែងការណ៍ម្នាក់ម្តងៗ របស់មេដឹកនាំគណបក្សប្រឆាំង គឺបាតុកម្មរបស់គណបក្សប្រឆាំងនៅបន្តជួបជុំនៅទីលានប្រជាធិបតេយ្យ ដោយមិនមានការដើរហែក្បួនតាមដងផ្លូវទៅកាន់ គ.ជ.ប. ដូចសេចក្តីប្រកាសពីមុនឡើយ។
កាលពីថ្ងៃទី២៣មេសាម្សិលមិញ ក្រសួងមហាផ្ទៃ បានសម្រេចមិនឲ្យគណបក្សសង្គ្រោះជាតិ ធ្វើបាតុកម្មដើរហែក្បួនតាមផ្លូវនៅទីក្រុងភ្នំពេញ នាព្រឹកថ្ងៃទី២៤មេសានេះឡើយ។ តែក្រសួងមហាផ្ទៃ ក៏ដូចជាសាលារាជធានីភ្នំពេញដែរ បានអនុញ្ញាតឲ្យគណបក្សប្រឆាំងជួបជុំធ្វើបាតុកម្មនៅទីលានប្រជាធិបតេយ្យនៅជិតវត្តភ្នំ។
អ្នកនាំពាក្យក្រសួងមហាផ្ទៃ លោកឧត្តមសេនីយ៍ឯក ខៀវ សុភ័គ បានលើកហេតុផលថា ដោយសារតែបញ្ហាកកស្ទះចរាចរណ៍ ប៉ះពាល់សណ្តាប់ធ្នាប់សាធារណៈ និងសន្តិសុខសង្គម ទើបលោកឧបនាយករដ្ឋមន្ត្រី ស ខេង មិនអនុញ្ញាតឲ្យគណបក្សសង្គ្រោះជាតិធ្វើបាតុកម្មដើរហែក្បួនអ្វីឡើយ នៅថ្ងៃទី២៤មេសានេះ។ ក៏ប៉ុន្តែភ្លាមៗនោះ តំណាងគណបក្សសង្គ្រោះជាតិ លោក ហូរ វ៉ាន់ បានបញ្ជាក់កាលពីថ្ងៃម្សិលមិញថា គណបក្សប្រឆាំងរបស់លោក នៅតែបន្តធ្វើបាតុកម្មដូចការគ្រោងទុក ដោយការដើរហែក្បួន បន្ទាប់ពីជួបជុំថ្លែងការណ៍នៅទីលានប្រជាធិបតេយ្យ។ យ៉ាងណាក៏ដោយ កាលពីរសៀលថ្ងៃទី២៣មេសាម្សិលមិញ លោក កែប ជុតិមា អភិបាលរាជធានីភ្នំពេញ ជិតផុតអាណត្តិ បានផ្ញើលិខិតទៅកាន់គណបក្សសង្គ្រោះជាតិ ដោយក្រើនរម្លឹកដល់គណបក្សប្រឆាំងនេះឲ្យគោរពតាមសេចក្តីសម្រេចនៃកិច្ចប្រជុំពិភាក្សាពីគម្រោងធ្វើបាតុកម្មរបស់គណបក្ស សង្គ្រោះជាតិ កាលពីព្រឹកថ្ងៃទី២២មេសា។ ជាសេចក្តីសម្រេច ដែលអាជ្ញាធរក្រុងភ្នំពេញ បានសម្រេចថា គណបក្សសង្គ្រោះជាតិ ធ្វើបាតុកម្មនៅទីលានប្រជាធិបតេយ្យ ដោយមិនអនុញ្ញាតឲ្យដើរ ហែក្បួន ដូចការទាមទារឡើយ៕

Posted in: khmer news

khmer news

Freedom of news in the world ,wanted to show the problem in the societies

ខ្មែរស្រឡាញ់ខ្មែរចេះជួយខ្មែរនោះប្រទេសរបស់យើងអាចរីកចំរើនបាន

Cambodia's Tourism Attraction

My Friend Blog List

Here ! Computer Technique for you

Wednesday, April 24, 2013