ជន​ជាតិ​ភាគ​តិច​ប្តឹង​វៀតណាម​កាប់​បំផ្លាញ​ឈើ

គំនរ​ឈើ​ដែល​វៀត​ណាម​កាប់​​ក្នុង​ព្រៃ​សហ​គមន៍ របស់​ជន​ជាតិ​ភាគ​តិច​ចា​រ៉ាយ។ រូប​ថត អង្គ​ការ​អាដ​ហុក​

Friday, 14 December 2012
ផាក់ ស៊ាង​លី
The Phnom Penh Post

រតនគិរីៈ ប្រជា​សហគមន៍​៦នាក់​តំណាង​ឲ្យ​ជន​ជាតិ​ដើម​ភាគ​តិច​ចារ៉ាយ​២០០​គ្រួសារ​នៅ​ ខេត្ត​រតន​គិរី​បាន​ដាក់​ពាក្យ​បណ្តឹង​ទៅ​សមាគម​អាដហុក ដើម្បី​ស្នើ​សុំ​អន្តរាគមន៍​អំពី​សកម្មភាព​ឈូស​ឆាយ​ដី​ព្រៃ​សហគមន៍​និង​កាប់​ ឈើ ​ដឹក​ចេញ​ដោយ​ខុស​ច្បាប់​របស់​ក្រុម​ហ៊ុន​វៀតណាម​ពីរ​។

លោក រម៉ាស់ ឆ្វាង​តំណាង​សហគមន៍​ភូមិ​ឡំ​ ឃុំ​ប៉ក់ញ៉ៃ ស្រុក​អូរយ៉ាដាវ​បាន​ឲ្យ​ដឹង​ថា​ពួក​គាត់​ឡើង​មក​ដាក់​ពាក្យ​បណ្តឹង​ទៅ​សមាគម អាដហុក អំពី​ក្រុមហ៊ុន​វៀតណាម​ពីរ​ដែល​កំពុង​ធ្វើ​សកម្មភាព​ឈូស​ឆាយ​ព្រៃ​ សហគមន៍ និង​កាប់​បំផ្លាញ​ព្រៃឈើ​និង​ផ្តល់​ភស្តុតាង​ ជា​វីដីអូ​ឃ្លីប​ខ្លី​មួយ​ពី​ការ​កាប់​ឈើ​របស់​ជន​ជាតិ​វៀតណាម​នៅ​ក្នុង​ព្រៃ​សហគមន៍។ លោក​រម៉ាស់ ឆ្វាង​ឲ្យ​ដឹង​ថា​ «យើង​ខ្ញុំ​ជា​ជនជាតិ​ដើម​ភាគ​តិច​នេះ​សូម​ឲ្យ​វៀតណាម​ឈប់​កាប់​ឈើ​តទៅ​ទៀត ហើយ​សុំ​ឲ្យ​ថែ​រក្សា​ព្រៃ​នោះ​ជា​សមូហ​ភាព​មិន​ចង់​វាស់​ចែក​គ្នា​នោះ​ទេ»។

លោក​ថា ក្នុង​ពាក្យ​បណ្តឹង​ដែល​បាន​ដាក់​ទៅ​សមាគម​អាដហុក​នោះ​គឺ​ដើម្បី​សុំ​អន្តរាគមន៍​លើ​បញ្ហា​បី​ចំណុច​ដូចជា ទប់ស្កាត់​ការ​កាប់​ព្រៃ​សហគមន៏ ដឹក​ឈើ​ចេញ​ដោយ​ខុស​ច្បាប់​ពី​សំណាក់​ក្រុមហ៊ុន កាត់​វៀល​ដី​សហគមន៍​ទុក​កុំ​ឲ្យ​មាន​ការ​ប៉ះ​ពាល់​ដោយ​សារ​ការ​ផ្តល់ សម្បទាន​សេដ្ឋកិច្ច កុំ​ឲ្យ​មាន​ការ​គំរាម​កំហែង​ឲ្យ​ជន​ជាតិ​ដើម​ភាគ​តិច​ចុះ​ឈ្មោះ​ទទួល យក​ការ​កាន់​កាប់​ដី​ជា​លក្ខណៈ​ឯកជន។

លោកឆាយ ធី អ្នក​សម្រប​សម្រួល​សមាគម អាដ​ហុក​ខេត្ត​រតនគិរី​បាន​ឲ្យ​ដឹង​ថា បន្ទាប់​ពី​ទទួល​បាន​ពាក្យ​បណ្តឹង​នោះ ​អាដហុក​ក៏​បាន​ដាក់​ពាក្យ​បណ្តឹង​សុំ​អន្តរាគមន៍​នោះ​ទៅ​អាជ្ញាធរ ខេត្ត​រួច​រាល់​ហើយ​កាល​ពី​ល្ងាច​ម្សិលមិញ។ លោក​បាន​ឲ្យដឹង​​ទៀត​ថា​៖​«​បើ​កាត់​ដី​ឲ្យ​ពួក​គាត់​ជា​លក្ខណៈ​ឯកជន នោះ​វា​អាច​ធ្វើ​ឲ្យ​ពួក​គាត់​មាន​បញ្ហា​ទៅ​ថ្ងៃ​មុខ​»។

លោក​ ប៉ាវ​ ហម​ផាន​អភិបាល​ខេត្ត​រតនគិរី​បាន​បដិសេធ​ចំពោះ​ការ​ចោទ​ប្រកាន់​ពី​ប្រជា ​សហគមន៍​ទាំង​នោះ ដោយ​លោក​បាន​មាន​ប្រសាសន៍​ថា​ ពុំ​មាន​ដឹក​ឈើ​ចេញ​ទៅ​វៀតណាម​ទេ ហើយ​អាជ្ញាធរ​ក៏​មិន​បាន​បង្ខំ​ឲ្យ​ប្រជាពលរដ្ឋ​ចុះ​បញ្ជី​វាស់​វែង​ដី​ នោះ​ទេ​គឺ​ធ្វើ​ឡើង​ដោយ​ការ​ស្ម័គ្រចិត្ត។ លោក​បាន​ឲ្យ​ដឹង​ទៀត​ថា​ ៖ «ខ្ញុំ​ឲ្យ​ប៉ូលិស​ចុះ​ស្រាវ​ជ្រាវ​ភ្លាមៗ វា​​អត់​ដែល​មាន​ទេ​...អា​បាតុភាព​ដឹក​ឡាន​ចេញ​តាម​ច្រក​របៀង​នោះ​។ ​បើ​ម៉ូតូ​មាន​គឺ​ពលរដ្ឋ មាន​ដឹក​ឈើ​ចូល​ទៅ​លក់​នៅ​វៀតណាម ឃាត់​មិន​ស្តាប់​ទេ»

Posted in: khmer news