10:15 PM
specialshowtoday
តារាចម្រៀង លោកខេមរៈ សិរីមន្ត បានបាត់មុខឈឹង ក្រោយហេតុការណ៍គ្រោះថ្នាក់ដ៏អាក្រក់កាលពីថ្ងៃទី ០៧ មីនា សប្ដាហ៍មុន។ ប៉ុន្តែថ្មីៗនេះ មានប្រភពខ្សឹបប្រាប់ថា លោក បានលបមកចូលបុណ្យសពលោក អ៊ាច វណ្ណៈ កូនប្រុសយាយណយ សំណាង ស្ងាត់កាលប៉ុន្មានថ្ងៃមុននេះ។
ករណីលបមកចូលរួមបុណ្យសពកូនប្រុសយាយ ណាង ស្ងាត់ៗរបស់តារាចម្រៀង ខេមរៈ សិរីមន្ត នេះ គឺបានកើតឡើងកាលពីថ្ងៃទី ០៨ មីនា កន្លងទៅ គឺក្រោយហេតុការណ៍អាក្រក់តែ ១ ថ្ងៃប៉ុណ្ណោះ។ ព័ត៌មាននេះ បានធ្លាយចេញក្នុងពេលដែលភ្នាក់ងារ Sabay នាំយកបច្ច័យទៅចូលបុណ្យសពលោក អ៊ាច វណ្ណៈ ដែលត្រូវជាកូនរបស់អ្នកស្រីណយ សំណាង កាលពីថ្ងៃទី ៩ មិនា កន្លងទៅ ហើយត្រូវសាច់ញាតិរបស់សពមួយចំនួន បានខ្សឹបប្រាប់។
ប្រភពជាសាច់ញាតិសព លោក អ៊ាច វណ្ណៈ ប្រាប់ថា “ព្រឹកម្សិលមិញ ខេមរៈ ភារុណ ម៉ោចូលបុណ្យ ដល់យប់ឡើង បង ខេមរៈ សិរីមន្ត ម៉ោ ទៀត!” ។ ប៉ុន្តែទោះយ៉ាងណា ប្រភពដដែលមិនបាននិយាយលម្អិតទេ ដោយគេបាននិយាយថា “ចង់ដឹងច្បាស់សួរពូខ្ញុំ(អ៊ាច វណ្ណា ប្អូនប្រុសសព អ៊ាច វណ្ណៈ) ទៅទើបដឹង!”។
ពាក់ព័ន្ធនឹងករណីនេះ លោក អ៊ាច វណ្ណា ប្អូនប្រុសសពបានលោក អ៊ាច វណ្ណា បានទទួលស្គាល់ថា លោក សិរីមន្ត ពិតជាបានមកចូលរួមបុណ្យសពបងប្រុសលោកមែន គឺថ្ងៃតែមួយជាមួយលោក ខេមរៈ ភារុណ ជាបងដែលបានមកចូលរួម និងប្រគល់ទ្រព្យសម្បត្តិជាប់ខ្លួនបងប្រុសលោក ជូនបងថ្ងៃស្រីរបស់លោក នាព្រឹកថ្ងៃទី ០៨ មីនា។
លោក វណ្ណា លើកឡើងថា “តាមខ្ញុំបានសង្កេតមើល គឺថាសភាពនៃរាងកាយរបស់លោកខេមរៈ សិរីមន្ត ពិតជាមិនមានបញ្ហាអ្វីឡើយ”។
តាម ការបញ្ជាក់របស់លោក វណ្ណា ដដែល បានឲ្យដឹងថា ក្នុងថ្ងៃដែលលោកខេមរៈ សិរីមន្ត មកចូលបុណ្យសពរបស់បងប្រុសខ្លួននោះ លោក ខេមរៈ សិរីមន្ត បានរៀបរាប់ពីរឿងរ៉ាវនៃគ្រោះថ្នាក់ ថ្ងៃនោះ ឲ្យក្រុមគ្រួសារលោកស្ដាប់ថា មុនពេលគ្រោះថ្នាក់លោក សិរីមន្ត បានឃើញ ឡានកុងតឺន័រនោះមុនគេ ខណៈអ្នកផ្សេងទៀត ខ្លះកំពុងតែដេកលក់ ខ្លះកំពុងស្ដាប់បទចម្រៀង។ ដូច្នេះលោក ក៏ស្រែកប្រាប់ឲ្យគ្រប់គ្នាឱនចុះ ប៉ុន្តែមានតែលោកប៉ុណ្ណោះ ដែលក្រាបចុះទាន់ទើបផុតជីវិត ស្របពេលលោក ស្ថិតនៅខាងស្ដាំដៃផង។
លោក អ៊ាច វណ្ណា បន្តតាមសំដីលោក លោក ខេមរៈ សិរីមន្ត ថា
“គាត់បានសន្លប់មួយភាំង ទើបដឹងខ្លួនវិញ គាត់គិតថា ខ្លួនមិនរស់ទេ ឡានរបស់គាត់ខ្ទេចអស់ មនុស្សបានស្លាប់ និងរបួសពេញឡាន ហើយគាត់បានលូនចេញពីឡាន បន្ទាប់មកបានទូរស័ព្ទឲ្យក្រុមគ្រួសារគាត់ជាមុន ទើបប្រមូលរបស់មានតម្លៃមួយចំនួនទុកតាមក្រោយ ហើយគាត់បានដើរមកផ្ទះអ្នកភូមិនៅក្បែរនោះឲ្យគេជួយ គាត់ជាមនុស្សមានសំណាងជាងគេ!”។
លោក អ៊ាច វណ្ណា សង្កត់ធ្ងន់ថា តាមការពិនិត្យរបស់លោក ខេមរៈ សិរីមន្ត មានរបួសតែដៃ និងជើងបន្តិចបន្តួចតែប៉ុណ្ណោះ។
លោក យាយ ណយ សំណាង បានរៀបរាប់ទាំងទឹកភ្នែករលីងរលោងបន្ថែមថា “សិរីមន្តវាមកឱបខ្ញុំ វាយំ វារៀបរាប់ហេតុការណ៍នោះឲ្យខ្ញុំស្ដាប់ ខ្ញុំនិយាយអត់ចេញទេ!”។
បើ តាមការឲ្យដឹងពីអ្នកស្រីណយ សំណាង លោកខេមរៈ សិរីមន្ត និងក្រុមគ្រួសារ បានចូលបុណ្យសពកូនប្រុសរបស់គាត់ មានចំនួនជិតមួយពាន់ដុល្លារ ។ ក្នុងនោះលោកខេមរៈ សិរីមន្ត បានចូលបុណ្យចំនួន៥៤០ដុល្លារ ឪពុកនឹងម្ដាយរបស់លោកខេមរៈ សិរីមន្ត ចំនួន១៥០ដុល្លារ ផងដែរ។
បើទោះនេះជាការចេញមុខយ៉ាងស្ងាត់ កំបាំង របស់លោក សិរីមន្ត ប៉ុន្តែជាលើកដំបូង បន្ទាប់ពីគ្រោះថ្នាក់កាលពីថ្ងៃទី ០៧ មីនា។ ដូច្នេះ ដោយផ្អែកតាមប្រភពក្រុមគ្រួសារលោក យាយ ណយ ល្មមឲ្យប្រិយមិត្តអ្នកគាំទ្រ តារាចម្រៀងលោក ខេមរៈ សិរីមន្ត ប្រាកដចិត្តហើយថា តារាចម្រៀងល្បីរូបនេះ ពិតជាមិនមានគ្រោះថ្នាក់ធ្ងន់ធ្ងរ ពិតប្រាកដមែន។ អីចឹងហើយ គេជឿថា លោក នឹងចេញមុខបកស្រាយជាសាធារណៈក្នុងពេលឆាប់ៗខាងមុខនេះ មិនខាន។
តាមដានព័ត៌មានតារាដែលមានបញ្ហាផ្សេងៗទៀត ចុចទីនេះ៕
From sabay sabay
Posted in: khmer news
0 comments:
Post a Comment