សន្ទស្សន៍ប្រាក់ដុល្លារអាស៊ី Bloomberg-JPMorgan បានធ្លាក់ចុះខ្លាំងបំផុតក្នុងរយៈពេល ១សប្តាហ៍ បន្ទាប់ពីក្រុមអ្នកបង្កើតគោលនយោបាយអឺរ៉ុប បរាជ័យក្នុងការបង្កើតផែនការដើម្បីទប់ស្កាត់វិបត្តិបំណុលរបស់ តំបន់ នេះ។ រដ្ឋមន្ត្រីក្រសួងហិរញ្ញវត្ថុនានាមកពីតំបន់អឺរ៉ុប បានថ្លែងកាលពីសប្តាហ៍មុនថា ស្ថានភាពនេះមិនបានបន្សល់ទុកនូវឱកាសណាមួយសម្រាប់ការកាត់បន្ថយ ពន្ធ ឬបង្កើនការចំណាយបន្ថែម ដើម្បីជំរុញសេដ្ឋកិច្ចរបស់ប្រទេសទាំងនោះ នោះទេ។ កាលពីសប្តាហ៍មុនក្រុមហ៊ុនមូលនិធិពិភពលោក (Global funds) បានលក់ភាគហ៊ុនរបស់ប្រទេសកូរ៉េខាងត្បូង តៃវ៉ាន់ និងឥណ្ឌូនេស៊ីច្រើនជាងទិញចូលក្នុងទឹកប្រាក់ ១,៦ពាន់លានដុល្លារ នេះបើតាមទិន្នន័យរបស់ផ្សារភាគហ៊ុន។
សន្ទស្សន៍ប្រាក់ដុល្លារនៅអាស៊ី ដែលតាមដានរូបិយប័ណ្ណទិញលក់ច្រើនបំផុតទាំង ១០ នៅអាស៊ី ដោយមិនរាប់បញ្ចូលប្រាក់យ៉េននេះ បានធ្លាក់ចុះ ០,៤ភាគរយ នៅត្រឹម ១១៧,១៨ គិតត្រឹមម៉ោង ១០ និង ១៥នាទីព្រឹកម្សិលមិញនៅទីក្រុងហុងកុង។ ប្រាក់រូបពៀរបស់ឥណ្ឌូនេស៊ី និងប្រាក់រីងហ្គីតរបស់ម៉ាឡេស៊ី បានធ្លាក់ចុះ ០,៨ភាគរយ នៅត្រឹម ៨ ៨៧៣រូបពៀ និង១,១០៣៣រីងហ្គីតក្នុងមួយដុល្លារ នេះបើតាមទិន្នន័យរៀបរៀងដោយទីភ្នាក់ងារ Bloomberg។ ប្រាក់វ៉ុនរបស់ប្រទេសកូរ៉េខាងត្បូង បានធ្លាក់ថ្លៃ ០,៥ភាគរយ នៅត្រឹម ១ ១១៧,៩៣ វ៉ុន ក្នុងមួយដុល្លារ។
លោក Amonthep Chawla ជាអ្នកវិភាគទីផ្សារប្រចាំទៅទីក្រុងបាងកកនៅធនាគារ Kasikornbank Pcl បានថ្លែងថា៖ «នៅពេលវិនិយោគិន មិនមានទំនុកចិត្តចំពោះស្ថានភាពនៅអឺរ៉ុប ពួកគេព្យាយាមកាន់កាប់ប្រាក់ដុល្លារ ព្រមទាំងព្យាយាមដកខ្លួនឲ្យឆ្ងាយពីទ្រព្យសកម្មដែលមានហានិភ័យ។ វិនិយោគិន កំពុងរង់ចាំមើលគោលនយោបាយនានា ដែលនឹងជួយសង្គ្រោះប្រទេសនានានៅអឺរ៉ុប»។
ដោយឡែករដ្ឋាភិបាលឥណ្ឌូនេស៊ី បានឲ្យដឹង កាលពីថ្ងៃទី១៥ ខែកញ្ញាថា ខ្លួនកំពុងរៀបចំកញ្ចប់ថវិកាជំរុញសេដ្ឋកិច្ច ដែលអាចនឹងអនុវត្តនៅឆមាសទីមួយក្នុងឆ្នាំ២០១២ ប្រសិនបើសេដ្ឋកិច្ចពិភពលោក ធ្លាក់ចុះ និងប៉ះពាល់ដល់កំណើនសេដ្ឋកិច្ច៕ KC
0 comments:
Post a Comment