ភ្នំពេញៈ សហគ្រាសធុនតូច និងមធ្យម (SME) នៅតែទទូចឲ្យធនាគារពាណិជ្ជ និងគ្រឹះស្ថានមីក្រូហិរញ្ញវត្ថុទាំងអស់ នៅកម្ពុជា បន្ទាប់ពីតម្លៃការប្រាក់ ដើម្បីកាត់បន្ថយលំហូរនាំចូលផលិតផលពីក្រៅប្រទេសមកកម្ពុជា។
SME ជាច្រើន នៅកម្ពុជា ព្រួយបារម្ភថា អត្រាការប្រាក់ខ្ពស់នៅធនាគារ អាចកាត់បន្ថយផលិតភាព។ នេះបើតាមលោក តែ តាំងប៉រ ប្រធានសម្ព័ន្ធសមាគម SME នៅកម្ពុជា។ លោកបានថ្លែងថា៖ «យើងស្វែងរកប្រាក់ពី MFI និងធនាគារ ប៉ុន្តែពួកគេ កំពុងស្វែងរកប្រាក់ចំណូលជាច្រើនពីយើង ខណៈដែលអាជីវកម្មរបស់យើង រកប្រាក់បានតែគ្រប់សម្រាប់បង់ថ្លៃការប្រាក់តែប៉ុណ្ណោះ។ នេះដល់ពេលត្រូវផ្លាស់ប្តូរហើយ»។
លោក តែ តាំងប៉រ បានបន្ថែមថា ការកាត់បន្ថយអត្រាការប្រាក់ ជាកត្តាចំាបាច់សម្រាប់លើកកម្ពស់ផលិតភាព SME និងបន្ថយការពឹងផ្អែកខ្លាំងលើទំនិញនាំចូល។
លោកបានបន្តថា៖ «ដើម្បីជួយ SME ដូច្នេះ MFI គួរពិចារណាលើអត្រាការប្រាក់ទាបត្រឹម ១០ភាគរយ ហើយធនាគារពាណិជ្ជ គួរទម្លាក់អត្រាការប្រាក់មកនៅ ៧ ទៅ៨ភាគរយ»។ លោកបន្ថែមថា៖«ការធ្វើបែបនេះនឹងធ្វើឲ្យផលិតភាពរបស់ SME កើនឡើង ហើយលំហូរទំនិញពីបរទេស នឹងត្រូវទប់ស្កាត់»។
លោក តែ តាំងប៉រ បានឲ្យដឹងថា ក្រុមហ៊ុននៅកម្ពុជាប្រហែល ៩៥,៥ភាគរយ ជាSME។ លោកបានអះអាងថានឹងស្វែងរកជំនួយនៅកម្ពុជា ពិសេសពីNBC។
SME មួយចំនួន សង្កត់ធ្ងន់លើតម្រូវការកាត់បន្ថយអត្រាការប្រាក់ គឺស្របគ្នានឹងការលើកឡើងរបស់សម្ព័ន្ធសមាគមSME ដែរ។
លោកស្រី សូសុភា ម្ចាស់ក្រុមហ៊ុនទឹកបរិសុទ្ធ AC បានប្រាប់ភ្នំពេញ ប៉ុស្តិ៍ថា៖ «ជួនកាល យើងស្វែងរកប្រាក់ចំណេញពីអាជីវកម្មរបស់យើង។ ទោះបីជាយ៉ាងនេះក្តី នេះគ្រាន់តែសម្រាប់បង់ការប្រាក់ប៉ុណ្ណោះ»។
លោកស្រីបានបន្ថែមទៀតថា៖ «បើរដ្ឋាភិបាល និងធនាគារចង់ជួយយើង ពួកគេគួរពិចារណាលើការបន្ទាបអត្រាការប្រាក់ ដែលឲ្យយើងបង្កើនផលិតភាព និងមិនពឹងផ្អែកទំនិញនាំចូល»។
រដ្ឋាភិបាល បានឲ្យដឹងកាលពីខែកុម្ភៈថា ខ្លួននឹងផ្តោតលើការលើកកម្ពស់ការអភិវឌ្ឍវិស័យឧស្សាហកម្ម។
លោកនាយករដ្ឋមន្ត្រី ហ៊ុន សែន ថ្លែងក្នុងវេទិកាសេដ្ឋកិច្ចកម្ពុជានៅពេលនោះថា៖ «កម្ពុជា ចាំបាច់ត្រូវធ្វើទំនើបកម្មសេដ្ឋកិច្ចរបស់ខ្លួន តាមរយៈការលើកកម្ពស់ការអភិវឌ្ឍវិស័យឧស្សាហកម្ម ដើម្បីសម្រេចបានកំណើនប្រកបដោយនិរន្តរភាព»។
លោកស្រី ងួន សុខា អគ្គនាយកធនាគារជាតិនៃកម្ពុជា អះអាងថា រដ្ឋាភិបាលដឹងអំពីស្ថានភាពបច្ចុប្បន្ន។ លោកស្រី មានប្រសាសន៍ថា៖ «យើងកំពុងព្យាយាមយ៉ាងអស់ពីសមត្ថភាព ដើម្បីសម្របសម្រួល SME ប៉ុន្តែយើងទាំងអស់គ្នា ដឹងហើយថា ប្រព័ន្ធធនាគាររបស់យើងពឹងផ្អែកលើការផ្តល់កម្ចីដោយមានវត្ថុ បញ្ចាំ។ SME ជាច្រើនមិនមានវត្ថុបញ្ចាំឡើយ ដូច្នេះពួកគេ ត្រូវគិតអត្រាការប្រាក់ខ្ពស់ ដើម្បីចៀសវាងហានិភ័យ»។
មន្ត្រីផ្សេងទៀត មកពីវិស័យធនាគារ លើកឡើងថា វានឹងមិនអាចទៅរួចឡើយ សម្រាប់ការកាត់បន្ថយអត្រាការប្រាក់នោះ។
លោក ជា ផល្លារិន ប្រធានសមាគមមីក្រូហិរញ្ញវត្ថុកម្ពុជា មានប្រសាសន៍ថា៖ «យើងមិនអាចបន្ទាបអត្រាការប្រាក់ទាបឡើយ ដោយសារអត្រាការប្រាក់ដែលយើងទទួលបានពីបរទេស មានអត្រាខ្ពស់»។ លោកបន្ថែមថា៖ «យើងព្យាយាមកាត់បន្ថយថ្លៃប្រតិបត្តិការ ដើម្បីកាត់បន្ថយអត្រាការប្រាក់»។ លោក ថ្លែងថា អត្រាការប្រាក់ពីកម្ចីបរទេស គឺជាង១០ភាគរយ សម្រាប់ប្រាក់រៀល និង៦ ទៅ៧ភាគរយសម្រាប់ប្រាក់ដុល្លារអាមេរិក៕CS
0 comments:
Post a Comment