9:51 PM
specialshowtoday
សកម្មភាពកាប់រានព្រៃឈើយកដីអនាធិបតេយ្យកំពុងកើតមានច្រើននៅឯ ស្រុកថាឡាបរិវ៉ាត់ ខេត្តស្ទឹងត្រែង។ ក្រុមសហគមន៍ការពារព្រៃឈើឲ្យដឹងថា សកម្មភាពកាប់រានព្រៃឈើនេះ មន្ត្រីអាជ្ញាធរមូលដ្ឋានហាក់ដូចជាមិនមានវិធានការបង្ក្រាបជាក់ លាក់ឡើយ។
ដោយ រដ្ឋា វីសាល 2013-03-24 RFA
ព្រៃឈើប្រមាណ ២០០ ទៅ ៣០០ហិកតារថ្មីទៀត
ត្រូវគេកាប់រានដើម្បីយកដីនៅឃុំចំនួនពីរក្នុងស្រុកថាឡាបរិវ៉ាត់
ខេត្តស្ទឹងត្រែង ចាប់ពីដើមឆ្នាំ២០១៣ រហូតបច្ចុប្បន្ន។
សេចក្ដីរាយការណ៍របស់ប្រជាពលរដ្ឋសហគមន៍ឃុំសំអាង និងឃុំអន្លង់ជ្រៃ
ឲ្យដឹងថា ព្រៃឈើដែលត្រូវគេកាប់រាន គឺនៅតំបន់វាលដែង ឃុំសំអាង
ជាប់ព្រំប្រទល់ឃុំអន្លង់ជ្រៃ និងនៅតំបន់ភ្នំម្លូរ
ព្រំប្រទល់ស្រុកថាឡាបរិវ៉ាត់ ជាប់នឹងស្រុកឆែប ខេត្តព្រះវិហារ។
ប្រជាពលរដ្ឋរស់នៅភូមិអន្លង់ជ្រៃ
សុំមិនបញ្ចេញឈ្មោះឲ្យដឹងនៅថ្ងៃអាទិត្យ ទី២៤ ខែមីនា ឆ្នាំ២០១៣ ថា
កម្មករប្រដាប់ដោយម៉ាស៊ីនកាត់ឈើស្វ័យប្រវត្តិប្រមាណ ៥០នាក់
ត្រូវបានឈ្មួញអ្នកមានប្រាក់ជួលឲ្យកាប់រានព្រៃដើម្បីយកដី។
ចំណែកមន្ត្រីអាជ្ញាធរមូលដ្ឋានឃុំស្រុក មិនបានយកចិត្តទុកដាក់
បង្ក្រាបតាមបទបញ្ជារបស់ប្រមុខរាជរដ្ឋាភិបាលនោះទេ៖ «ព្រៃហ្នឹងគេ
អ្នកមានលុយកាប់ដល់កហើយ ប្រហែលជា ៧-៨គីឡូដី។
កាប់តាំងពីខែវស្សា រហូតដល់ឥឡូវ មិនទាន់បាត់ទេ
មិនទាន់ឈប់កាប់ទេ។ គេអត់ទប់ស្កាត់ទេ ព្រោះមេឃុំស្អីគេ
ធ្វើមិនដឹងមិនឮ គេថាគេធ្វើអ្វីធ្វើទៅ។កន្លែងសំខាន់ៗអស់ហើយ
កន្លែងសត្វនៅនិយាយទៅមានតែព្រៃធំភ្នំម្លូហ្នឹង
ពីរបីភ្នំអស់រលីងហើយ»។
ដូចគ្នានេះដែរ ប្រជាពលរដ្ឋរស់នៅឃុំសំអាង
សុំមិនបញ្ចេញឈ្មោះដែរមានប្រសាសន៍បញ្ជាក់ថា
អ្នកនៅពីក្រោយសកម្មភាពកាប់រានព្រៃ គឺជាប្រជាពលរដ្ឋចំណាកស្រុក
ប្រជាពលរដ្ឋមកពីភូមិជិតខាងក្នុងស្រុកថាឡាបរិវ៉ាត់
និងជាពិសេសក្រុមបុគ្គលជាមន្ត្រីប្រដាប់អាវុធក្នុងមូលដ្ឋាន
បានជួលកម្មករកាប់ព្រៃនោះ។
លោកបន្តថា សកម្មភាពកាប់រានព្រៃនេះ ធ្វើបានដោយសារមន្ត្រីមូលដ្ឋានបានទទួលលាភសក្ការពីអ្នកជួលកម្មករកាប់រានព្រៃ៖ «មិន
ត្រឹមប៉ុណ្ណឹងទេ មានទាំងប៉ូលិសស្រុក
ទាហានស្រុកទៅកាប់យកដែរហ្នឹងណា។ ប៉ុន្តែសហគមន៍គេអត់ហ៊ាន
បើគេឃើញអាទាហានហ្នឹងទៅសុទ្ធតែស័ក្ដិ៤ ស័ក្ដិ៥
កាន់កាំភ្លើងទៅដែរហ្នឹង។ កាំភ្លើងសុទ្ធតែម្នាក់ៗមួយដើម
ពិបាកដែរគ្នា ហើយបើមេឃុំ មេភូមិអត់ធ្វើអើពើផង»។
អភិបាលស្រុកថាឡាបរិវ៉ាត់ លោក ជា ថាវរិទ្ធ
បដិសេធមិនអធិប្បាយពីបញ្ហានេះ ពីព្រោះលោកអះអាងថា ជាប់រវល់។
ចំណែកនាយខណ្ឌរដ្ឋបាលព្រៃឈើខេត្តស្ទឹងត្រែង លោក អ៊ីវ ឯកសាវត្តី
មិនអធិប្បាយពិស្ដារពីសកម្មភាពកាប់ព្រៃដែលប្រជាពលរដ្ឋរាយការណ៍នោះ
ទេ ប៉ុន្តែលោកអះអាងថា កំពុងចាត់ការរឿងនេះហើយ៖ «ក្រុមការងារគេកំពុងចុះធ្វើការងារហ្នឹងហើយតើ!»។
ចំពោះបញ្ហានេះ មន្ត្រីផ្នែកអង្កេតសមាគមអាដហុក (ADHOC)
ខេត្តស្ទឹងត្រែង លោក ហូ សំអុល មានប្រសាសន៍បញ្ជាក់ថា
សកម្មភាពកាប់រានព្រៃឈើអនាធិបតេយ្យកើតមានច្រើន
បន្ទាប់ពីក្រុមការងារ និងនិស្សិតស្ម័គ្រចិត្តរបស់រាជរដ្ឋាភិបាល
បានចុះវាស់វែងចេញប័ណ្ណកម្មសិទ្ធិជូនដីប្រជាពលរដ្ឋតាមគោលនយោបាយ
ចាស់សកម្មភាពថ្មី។
លោកកត់សំគាល់ថា
សកម្មភាពបង្ក្រាបរបស់ក្រុមអាជ្ញាធរនៅមានការរើសអើង
បង្ក្រាបបានតែទៅលើពលរដ្ឋក្រីក្រគ្មានអំណាចគ្មានប្រាក់៖
«យើងសំណូមពរឲ្យខាងអាជ្ញាធរហ្នឹង ឲ្យតែអ្នកខុសយើងចាប់មកទាំងអស់
កុំថាទៅដល់អ្នកមានអំណាច យើងដោះលែង
ឬថាជាថ្នូរនឹងលុយកាក់ដោះលែងចាប់បានតែអ្នកក្រ អ្នកទន់ខ្សោយ។
សូមឲ្យអនុវត្តច្បាប់ទាំងអស់គ្នា»។
កាលពីដើមសប្ដាហ៍នេះកម្មករស៊ីឈ្នួលកាប់រានព្រៃឈើខុសច្បាប់
ចំនួន ៨នាក់ ត្រូវបានចាប់ខ្លួនបញ្ជូនទៅតុលាការ ក៏ប៉ុន្តែកម្មករ
៧នាក់ ត្រូវបានចៅក្រមតុលាការអប់រំដោះលែងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
Posted in: khmer news
0 comments:
Post a Comment