2:38 AM
specialshowtoday
កម្មវិធី មីស៊ីលក្រុងព្យុងយ៉ាង វិវឌ្ឍទៅមុខគួរឲ្យចាប់អារម្មណ៍ក្នុងរយៈពេលប៉ុន្មានទសវត្សរ៍មក នេះ ចាប់តាំងពីគ្រាប់រ៉ុក្កែតកាំភ្លើងធំ នៅទសវត្សរ៍ឆ្នាំ១៩៦០ និង ១៩៧០ រហូតដល់មីស៊ីលរយៈចម្ងាយខ្លី និងមីស៊ីលឆ្លងទ្វីបរយៈចម្ងាយមធ្យម នៅទសវត្សរ៍ឆ្នាំ១៩៨០ និង ១៩៩០។
ក្រុមប្រឹក្សាទំនាក់ទំនងអន្តរជាតិ (Council on Foreign Relations) ដែល ជាស្ថាប័នវិភាគឯករាជ្យមួយ បានឲ្យដឹងថា មីស៊ីលកូរ៉េខាងជើងខ្លះ មានសមត្ថភាពបំពាក់ក្បាលគ្រាប់នុយក្លេអ៊ែរ តែកូរ៉េខាងជើង មិនទាន់មានសមត្ថភាពអាចបង្កើតក្បាលគ្រាប់នុយក្លេអ៊ែរបាននៅឡើយ ទេ។
ឆ្នាំ ១៩៨៤ កូរ៉េខាងជើងបានបង្កើតមីស៊ីល Scud ដោយខ្លួនឯង ដែលមានឈ្មោះថា Hwasong-5 និង Hwasong-6 ព្រមទាំងមីស៊ីលរយៈចម្ងាយមធ្យមដែលឈ្មោះ Nodong។ Taepodong ជាមីស៊ីលចុងក្រោយដែលមានរយៈចម្ងាយឆ្ងាយ ដោយប្រើបច្ចេកវិទ្យារួមបញ្ចូលគ្នារវាងមីស៊ីលទាំងពីរខាងលើ។
មក ដល់ឆ្នាំ២០០៦ កូរ៉េខាងជើង បានបាញ់សាកល្បងមីស៊ីល Taepodong-2 ដែលអ្នកជំនាញជឿថា អាចមានចម្ងាយរាប់ពាន់គីឡូម៉ែត្រ និងគ្រាប់រ៉ុក្កែតមានបច្ចេកវិទ្យាពាក់ព័ន្ធ ក្នុងឆ្នាំ ២០០៩ និង ២០១២។ ប៉ុន្តែ ការសាកល្បងទាំង ៣ លើក បរាជ័យ។
ទោះបីយ៉ាងណាក៏ដោយ កូរ៉េខាងជើងបានបាញ់សាកល្បងគ្រាប់រ៉ុក្កែតដែលមាន ៣ ដំណាក់/កំណាត់ (3 stages) មួយផ្សេងទៀត ដោយជោគជ័យ កាលពីថ្ងៃទី ១២ ខែធ្នូ ឆ្នាំ ២០១២។ ការសាកល្បងនេះ ត្រូវសហគមន៍អន្តរជាតិថ្កោលទោស ដោយថា នេះជាការសាកល្បងមីស៊ីល មិនមែនផ្កាយរណបដូចជាការអះអាងដោយកូរ៉េខាងជើងទេ។
កូរ៉េខាងជើង មានមីស៊ីលរយៈចម្ងាយខ្លីជាច្រើន ដូចជា KN-02 ដែលអាចបាញ់បានចម្ងាយ ១២០ គីឡូម៉ែត្រ គឺគ្រប់គ្រាន់កម្ទេចទីតាំងយោធានៅក្នុងកូរ៉េខាងត្បូង។
មីស៊ីល Hwasong-5 និង Hwasong-6 មានរយៈចម្ងាយផ្សេងៗគ្នា គឺ ៣០០ គីឡូម៉ែត្រ និង ៥០០ គីឡូម៉ែត្រ។ នេះបើយោងតាមមជ្ឈមណ្ឌលស្រាវជ្រាវការមិនសាយភាយអាវុធរបស់អាមេរិក។ មីស៊ីលទាំងនេះ អាចបំពាក់ក្បាលគ្រាប់មិនមាននុយក្លេអ៊ែរ តែក៏អាចមានសមត្ថភាពបំពាក់ក្បាលគ្រាប់ជីវសាស្ត្រ គីមី និងនុយក្លេអ៊ែរផងដែរ។ មីស៊ីល Hwasong-5 និង Hwasong-6 ត្រូវបានសាកល្បង និងដាក់ពង្រាយរួចរាល់ហើយ និងអាចឲ្យកូរ៉េខាងជើង វាយប្រហារទីតាំងណាមួយនៅកូរ៉េខាងត្បូង បានគ្រប់ពេលវេលា។
កូរ៉េខាងជើង បានបង្កើតកម្មវិធីផលិតមីស៊ីល Nodong តាំង ពីចុងទសវត្សរ៍ឆ្នាំ១៩៨០ មកម្ល៉េះ។ Nodong មានរយៈចម្ងាយ ១០០០ គីឡូម៉ែត្រ និងអាចកម្ទេច ជប៉ុនបាន បើសិនកូរ៉េខាងជើងជោគជ័យលើមីស៊ីលនេះមែន។ ប៉ុន្តែ យោងតាមវិទ្យាស្ថានស្រាវជ្រាវយុទ្ធសាស្ត្រអន្តរជាតិបានឲ្យដឹងថា ការផលិត និងដាក់ពង្រាយមីស៊ីល Nodong មិនត្រូវដឹងច្បាស់នោះទេ។
មីស៊ីល Musudan
Musudan ដែលមានឈ្មោះផ្សេងជា Nodong-B ឬ Taepodong-X គឺជាមីស៊ីលឆ្លងទ្វីបរយៈចម្ងាយឆ្ងាយដែលអាចកម្ទេចកោះ Okinawa ប្រទេសជប៉ុន និងមូលដ្ឋានអាមេរិកនៅមហាសមុទ្រប៉ាស៊ីហ្វិក។ Musudan អាចបាញ់បានចម្ងាយ ២.៥០០ គីឡូម៉ែត្រ, ៣.២០០ គីឡូម៉ែត្រ ឬ ៤. ០០០ គីឡូម៉ែត្រ ដោយយោងតាមប្រភពផ្សេងៗជាច្រើន។ ការប៉ាន់ស្មានខុសៗគ្នា គឺដោយសារតែមីស៊ីលនេះ មិនដែលត្រូវគេសាកល្បងជាសាធារណៈ។
មីស៊ីល Taepodong-1 និង Taepodong-2
Taepodong-1 គឺ ជាមីស៊ីលមានច្រើនដំណាក់កាល (ពេលបាញ់ នឹងផ្ដាច់ជាកំណាត់ៗ តាមរយៈចម្ងាយ) ដំបូងរបស់កូរ៉េខាងជើង។ ដំណាក់ទី១នៃមីស៊ីលនេះគឺ មីស៊ីល Nodong និងដំណាក់ទី២ គឺមីស៊ីល Hwasong-6។ Taepodong-1 បាញ់បានចម្ងាយ ២.២០០ គីឡូម៉ែត្រ។
Taepodong-2 ក៏ជាមីស៊ីលឆ្លងទ្វីបមានពីរ ទៅ បី ដំណាក់ដែរ ប៉ុន្តែទំនើបជាង Taepodong-1។ Taepodong-2 មានរយៈចម្ងាយពី ៥.០០០ គីឡូម៉ែត្រ ដល់ ១៥.០០០ គីឡូម៉ែត្រ។ ប៉ុន្តែ មជ្ឈមណ្ឌលស្រាវជ្រាវការមិនរីកសាយភាយអាវុធរបស់អាមេរិក និយាយថា រយៈចម្ងាយឆ្ងាយបំផុតរបស់មីស៊ីលនេះ គឺ ៦.០០០ គីឡូម៉ែត្រ។ មុនខែធ្នូ ឆ្នាំ២០១២ Taepodong-2 ត្រូវកូរ៉េខាងជើងសាកល្បង ៣ ដង តែបរាជ័យ គឺឆ្នាំ ២០០៦, ២០០៩ និងខែមេសា ឆ្នាំ២០១២។
ការសាកល្បងចុងក្រោយកាលពីខែ ធ្នូ ឆ្នាំ២០១២ Taepodong-2 នេះ ហាក់ទទួលបានជោគជ័យ។ បើសិន Taepodong-2 ជោគជ័យ និងបាញ់ដល់រយៈចម្ងាយកំណត់របស់វាមែន មីស៊ីលនេះអាចកម្ទេចអូស្ត្រាលី តំបន់ផ្សេងៗរបស់អាមេរិក និងបណ្ដាប្រទេសផ្សេងៗទៀត៕
មីស៊ីលអន្តរទ្វីបកូរ៉េខាងជើង ក្នុងក្បួនព្យុះហយាត្រាយោធា គម្រប់ខួប ១០០ ឆ្នាំរបស់លោក គីម អ៊ីលស៊ុង (ឆ្នាំ២០១២)
ប្រែសម្រួល៖ សុផាតប្រភព និងរូបភាព៖ BBC
Posted in: khmer news
0 comments:
Post a Comment