ប្រាសាទ ធម្មានន្ទ

ប្រាសាទធម្មានន្ទមានទីតាំងនៅគីឡូម៉ែត្រលេខពីរ ផ្លូវវង់តូច ដែលចេញតាមទ្វារជ័យ នគរធំ មានប្រាសាទពីរនៅទន្ទឹមៗគ្នា ។ បា្រសាទមួយស្ថិតនៅខាងជើងផ្លូវឈ្មោះថា ប្រាសាទធម្មានន្ទ ចំណែកឯប្រាសាទមួយទៀតដែលស្ថិតនៅខាងត្បូងផ្លូវឈ្មោះថា បា្រសាទចៅសាយ ។ នៅទីនោះយើងសូមលើកយកតែប្រាសាទមួយក្នុងចំណោមប្រាសាទទាំងពីរមកធ្វើការបកស្រាយ ប្រាសាទមួយនោះគឺប្រាសាទ ធម្មានន្ទ ។ ប្រាសាទធម្មានន្ទគឺជាប្រាសាទដែល មានខ្នាតតូចដែលព័ទ្ធជុំវិញដោយប្រឡាយទឹក ដែលជនជាតិខ្មែរយើងមានជំនឿថា ប្រឡាយទឹកនេះជាប្រឡាយទឹកដែលឡោមព័ទ្ធភ្នំ ព្រះសុមេរុ ។ ប្រាសាទនេះខុសពីប្រាសាទចៅសាយត្រង់ថា មានធម្មមន្ទីរមួយកន្លែង នៅខាងស្តាំដៃ ឬនៅទិសខាងត្បូងនៃប្រាសាទ ។ ចំណែកប្រឡាយទឹកសព្វថ្ងៃនេះរីង គោកអស់ទៅហើយ ។
តើប្រាសាទធម្មានន្ទមានអ្វីទស្សនាខ្លះ ?
រូបចម្លាក់នៅសសរទ្វារខាងមុខ។មានរូបទេពអប្សរាដ៏មានសម្រស់ស្រស់ស្អាតដូចអប្សរានៅបា្រសាទអង្គរវត្តដែរ ហើយអ្វីដែលគួរឲចាប់អារម្មណ៍ផងដែរនោះគឺមានរូបទេពអប្សរានៅជាមួយនិង រូបចម្លាក់ទ្វារបាល ។
ផ្តែរខាងក្នុងមានរូបចម្លាក់ព្រះនារាយណ៍ទ្រង់គ្រុឌ ព្រះនារាយណ៍កន្ធែកព្រះបាទនៅលើស្មាគ្រុឌ មានអាវុធគ្រប់ដៃ ។ ចំណែកឯគ្រុឌវិញបានយកក្បាលវែកត្រសុលនាគចេញមក ពាក់កណ្តាល ដូច្នេះហើយបានជាមានក្បាលនាគម្ខាងពីរ ។ គេអាចចាត់ទុកថាប្លែក ហើយទិដ្ឋភាពបែបនេះគឺមានតែនៅបា្រសាទធម្មានន្ទ រីឯប្រាសាទផ្សេងៗទៀតមិន មានឡើយ ។


តួប្រាង្គប្រាសាទ
ក្បូរក្បាច់រចនាមានទាំងរូបមនុស្ស និងសត្វ ប្រភេទផ្សេងៗជាច្រើនឆ្លាក់រូបចម្លាក់ផុស លម្អនៅតាមផ្នែកផ្សេងៗដូចជាជញ្ជាំងមុខប្រាសាទ និង ជើងគ្រឹះនៃប្រាសាទ ។
នៅតាមគោបុរៈ
នៅមុខប្រាសាទមានរូបសម្លាក់សត្វគ្រុឌឈរពត់ខ្លួននៅលើជ្រុងកែងដំបូលនៃគោបុរៈ យ៉ាងស្រស់សង្ហារ ។
ប្រាសាទដែលកសាងក្នុងយុគសម័យតែមួយ
១. ប្រាសាទ អង្គរវត្ត
២. ប្រាសាទបន្ទាយសំរែ
៣. ប្រាសាទចៅសាយ
៤. ប្រាសាទព្រះពិធូរ
៥. ប្រាសាទបឹងមាលា
៦. ប្រាសាទភិមៃ (ខេត្តនគររាជសីមា សព្វថ្ងៃជារបស់ថៃ )
៧. ប្រាសាទភ្នំរុង (ខេត្តបុរីរម្យ សព្វថ្ងៃជារបស់ថៃ)
៨. ប្រាសាទវត្តភូ (សព្វថ្ងៃនៅប្រទេស ឡាវ) ។

Posted in: Khmer histories