ក្រោយ​គំរាម​វាយ​អាមេរិក កូរ៉េខាងជើង​បញ្ជូន​មីស៊ីល​ទៅ​ឆ្នេរ​ខាង​កើត​

ក្រោយ​គំរាម​វាយប្រហារ​អាមេរិក​កាល​ពី​ថ្ងៃព្រហស្បតិ៍​ម្សិលមិញ​រួច​​មក​ កូរ៉េខាងជើង​បាន​បញ្ជូន​មីស៊ីល​រយៈ​ចម្ងាយ​មធ្យម​របស់​ខ្លួន​ទៅ​កាន់​ឆ្នេរ​ខាងកើត។

​ ​​រដ្ឋមន្ត្រី​ការពារ​ប្រទេស​កូរ៉េខាងត្បូង​លោក​ Kim Kwan-Jin ​​បាន​និយាយ​ថា ​មីស៊ីល​របស់​កូរ៉េខាងជើង​អាច​​បាញ់​បាន​ “ចម្ងាយ​ឆ្ងាយ” ​ប៉ុន្តែ​មិន​អាច​បាញ់​ដល់​​ទឹកដី​អាមេរិក​នោះទេ។ ​លោក​បន្ថែម​ថា ​​ការ​បញ្ជូន​មីស៊ីល​នេះ​អាច​ធ្វើឡើង​ក្នុង​គោល​បំណង​ “បាញ់​សាកល្បង ​ឬ​ធ្វើ​សម​យុទ្ធ​យោធា” ប៉ុណ្ណោះ។

​មីស៊ីល​ប្រភេទ​ Musudan ​ដែល​កូរ៉េខាងជើង​បញ្ជូន​ទៅ​ឆ្នេរ​ខាងកើត

​ ​​ការ​វិភាគ​របស់​ក្រុម​ស៊ើបការណ៍​សម្ងាត់​កូរ៉េខាងត្បូង​ដែល​ចុះ​ផ្សាយ​ដោយ ​សារព័ត៌មាន​ Yonhap ​របស់​កូរ៉េខាងត្បូង​​លើក​ឡើង​ថា ​មីស៊ីល​ដែល​​ទីក្រុង​ព្យុងយ៉ាង​បញ្ជូន​ទៅទាំង​នោះ​ គឺ​មីស៊ីល​ប្រភេទ​ Musudan ​ដែល​អាច​បាញ់​បាន​ចម្ងាយ​ប្រហែល​ ៣០០០ ​គីឡូម៉ែត្រ​ ឬ​ច្រើន​ជាង​នេះ។

ប្រភព​ដដែល​បន្ត​ថា ​កូរ៉េខាងជើង​ទំនង​ជា​នឹង​បាញ់​នៅ​ពាក់កណ្ដាល​ខែ​មេសា​នេះ​​ ​ចំ​ពេល​​​​នៃ​ការ​ប្រារព្ធ​ពិធី​ខួប​កំណើត​ស្ថាបនិក​កូរ៉េខាងជើង​​​លោក​ គីម អ៊ីលស៊ុង។ ​ការ​បាញ់​​សាកល្បង​មីស៊ីល​ចូល​​ទៅ​ក្នុង​ដែន​ទឹក​​សមុទ្រ​ជប៉ុន​​ជា​រូបភាព ​​មួយ​ដែល​អ្នក​វិភាគ​និយាយ​ថា ​​​ទំនង​នឹង​ត្រូវ​ធ្វើ​ឡើង​ដោយ​កូរ៉េខាងជើង​ដើម្បី​​កុំ​ឲ្យ​បាក់​មុខ​​ពី​ ការ​គំរាម​កន្លង​មក។

​​​​​ស្រប​គ្នា​ នេះ​ អគ្គលេខាធិការ​អង្គការ​សហប្រជាជាតិ​លោក​ បាន​ គីមូន​ ​បាន​សម្ដែង​ក្ដី​បារម្ភ​ពី​បញ្ហា​សង្គ្រាម​នៅ​ឧបទ្វីប​កូរ៉េ​នេះ​ជា​ ខ្លាំង។ ​​ថ្លែង​ក្នុង​សន្និសីទ​សារព័ត៌មាន​មួយ​ក្នុង​ទីក្រុង​ម៉ាឌ្រីដ​ ប្រមុខ​អង្គការ​សហប្រជាជាតិ​បាន​សង្កត់​ធ្ងន់​ថា “ការ​គំរាមកំហែង​​អាវុធ​នុយក្លេអ៊ែរ​ មិន​មែន​ជា​ល្បែង​នោះ​ទេ។ ​វា​ពិតជា​ធ្ងន់ធ្ងរ​ខ្លាំង​ណាស់”។ លោក​ បាន​ បន្ត​ថា ​ការ​ប៉ាន់ស្មាន​ខុស​ណាមួយ​អាច​នឹង​នាំ​ទៅ​រក​​គ្រោះថ្នាក់​ដ៏​ធំធេង។

ងាក ​ទៅ​សហរដ្ឋអាមេរិក​វិញ ​រដ្ឋមន្ត្រី​ការពារ​ជាតិ​អាមេរិក​​​លោក​ Chuck Hagel ​​​និយាយ​ថា ​​ការ​បន្ត​គំរាម​កំហែង​ពី​​​ទីក្រុង​ព្យុងយ៉ាង​​គួបផ្សំ​នឹង​ការ​​សម្ញែង​​ សាច់ដុំ​ផ្នែក​យោធា​​ផង​នោះ​ជា​ការ​បង្ហាញ​ពី “គ្រោះថ្នាក់​ពិត​ ​និង​ច្បាស់លាស់”​ មួយ​ដល់​អាមេរិក​ និង​សម្ពន្ធមិត្ត​ដូចជា​ ​កូរ៉េខាងត្បូង​ ​និង​ជប៉ុន។

ឆ្លើយ​តប​ នឹង​ការ​គំរាមកំហែង​​​ អាមេរិក​​បាន​បញ្ជូន​ខែល​ការពារ​មីស៊ីល​​​រយៈកម្ពស់​ខ្ពស់​​ (THAAD) ​ទៅ​កាន់​មូលដ្ឋាន​យោធា​របស់​ខ្លួន​នៅ​លើ​កោះ​ហ្គាម​​ ស្ថិត​នៅ​ចម្ងាយ​ ៣៣៨០ ​គីឡូម៉ែត្រ​ភាគ​អាគ្នេយ៍​នៃ​កូរ៉េខាងជើង​ក្នុង​​មហាសមុទ្រ​ប៉ាស៊ីហ្វិក ​ដែល​​ជា​​កន្លែង​យោធា​​​ ៦ ពាន់​នាក់​កំពុង​ឈរ​ជើង​​ រួម​មាន​កង​​ម៉ារីន ​កង​នាវា​មុជ​ទឹក ​និង​កង​ទម្លាក់​គ្រាប់បែក​ជាដើម។

កាល ​ពី​ម្សិលមិញ​​កូរ៉េខាងជើង​បាន​គំរាម​​​វាយប្រហារ​អាមេរិក ​និង​សម្ពន្ធមិត្ត​កូរ៉េខាងត្បូង​ និង​ជប៉ុន​ដោយ​និយាយ​ថា “​សង្គ្រាម​នៅ​ឧបទ្វីប​កូរ៉េ​អាច​នឹង​​ផ្ទុះ​ឡើង​នៅ​ថ្ងៃ​នេះ​ ឬ​ថ្ងៃ​ស្អែក”។ ​លើស​ពី​នេះ​ កូរ៉េខាងជើង​​​បាន​បិទ​ច្រក​តំបន់​ឧស្សាហកម្ម​រួម​ Kaesong ​ដែល​​ប្រៀប​ដូចជា​ការ​កាត់​ផ្ដាច់​ដង្ហើម​ចុងក្រោយ​នៃ​សម្ពនភាព​កូរ៉េទាំង​ពីរ​​ផង​ដែរ៕

ប្រែ​សម្រួល៖ Zac
ប្រភព៖ Channelnewsasia

Posted in: khmer news